سكاكين هجرك
أقري الرسالة والمعاني لعيناك=أجيك لو حبو ن وزحفن مع البرد
شدي المطايا خافقي وسط يمناك=ما همني حاسد ولا صدني سد
أريق من دمع الفرح لأجل لقياك=واصب من شريان قلبي لكم ود
يا جعلني قبلك ولا أشوف دنياك=إلا بوجودك نجتمع يد في يد
لا تحسبين فراقكم زان يا ذاك=روحي لروحك فدوة ن لا توجد
الليل وسكاكين هجرك وطرياك=هلّت بجمر الشوق يا بهي الخد
روح ن تبيك وما تبي إلا محياك=هاج الضمير ولا تباريه بالصد
ترفقي شَوفي هلك والجسد جاك=ضميه وإلا وسّدي خده اللحد
وإذا نويتي أذكريني بدنياك=طيف الشهيد اللي توفى مع الفقد
وترحمي قولي وفا لك وناداك=لا يا عساك السعد يا منبع السعد
ذكراك في ينبوع فكر ن تغذاك=ما ارتاح لحظه من فراقك ولك عد
تذكّري كانك تبي تذكري هاك=موعد لقانا جيت وافي مع الوعد
طويت اميالن لعينك ولرضاك=ضمت حنايا قلبنا ريحة الورد
يوم ن لبستي شماغي اللي تمناك=وأغار منها عليك يا مترف القد
وإلا الجرس لا رن فزّيت بحماك=بسمة قتيله يوم نادوا لك ابعد
حتى المطاعم شاهده آه يا تاك=يوم ن تقولي لا تناظر لهم رد
قلتي أحبك قلت وش زاد بسماك=قلتي سعادة كون والكون ممتد
قلت أذبحك لا جاب غيري مسماك=قلتي وفا وما ولد لك بعد ند
ما انكر عفافك حشمتك فوق مرباك=وشموخ روح ن هايمه تطلب الرد
وأوعدك من بعد الملاقا بفرقاك=والموت حاصل في ملاقاه لا بد
بهجر جميع الخلق وأحيا بذكراك=قوتي ألم إن كان بُعدك تأكد
حسن بن مدهش السهيمي