[سهم المحبه]

الجزء الثالث .. أهلا بكم مع أجمل الامنيات .

وقالت كان عندك حق في تخمينك وشكك وتوقعاتك في مكانها .

النتيجة إجابية .. الف الف مبروك زوجتك حامل . فشهقت رفعه وكادت

تطيرمن الفرحه . وصعق غالي ولكن بصوت خافت بعض الشي وقال

بارك الله فيك يا دكتوره أنا ملاحظ على زوجتي أكثر من اسبوعين ماهي

كما يجب وخفت عليها من المضاعفات لا سمح الله وبغيت أتأكد أولا .

ولكن الحمد لله على ما وهب . طيب يا دكتوره ما يبي لها علاج . فقالت

الدكتوره ما دام إنها حامل ممنوع عليها العلاج إلا بوصفة من الطبيب

يبغالها فقط علاج خاص للحمل يعطيها القوة والمناعه . وأحذروا

تستخدموا أي علاج إلا بوصفة من الطبيب . فقال لها ان شاء الله شكرا لك

**********

وخرج غالي والفرح يملآ قلبه ورفعه لا تكاد تستطيع المشي . نعم هي

فرحانه والدنيا ما تسعها ولكن الوحم أثر على نفسيتها وأتعبها بعض الشي

قال غالي وش تبين تأكلين يالغلا يا أم الغلا . فضحكت وهي تنظر إليه

بحب عظيم وسقطت دمعه من عينها ولم تجبه بشي . فقال وليش هالدموع

وش لازمها . فقالت من فرحتي يالغلا وسعادتي يبي يجي غالي مع الغالي

فقال لها أن شاء الله وأنتي في أتم الصحة والعافية وهذي سنة الحياة

يا حبيبة القلب . تسلم بارك الله فيك وانت على روسنا وفي أتم الصحة

والعافية أن شاء الله تعالى . قال لها المهم وش أغديك اليوم أنتي معزومه

عندي . قالت والله ما أشتهي شي وكل ما ذكرت لي الاكل أحس ان روحي

تبي تطلع مني . أبي تميره وقهوة فقط خلنا نعود للبيت الله يخليك ماني

مشتهية شي الحين وخلها مره ثانيه . فقال لها تم . ولك علي وعد

ما تقهوين إلا من يديه يالغاليه . قالت تسلم الله يحفظك . رجعوا الى البيت

وقام وسوا لها قهوة وهي في مكان جيد التهوية وجاب لها التمر وجلس

يقهوي غلاته وهي لا تستطيع الجلوس من الفرح لهذا النبأ السار .

كأنها تذكرت شي مهم فمدت يدها لساعد غالي وقرصته بشويش دون أن

توجعه . وقالت شلون عرفت أني حامل . وهذي علوم نسوان وش عرفك

فيها . فضحك وقال لها الناس تعلموا يالغلا وكل شي أصبح عادي في هذه

الايام . قالت المهم باقي على رغبتك في الروحه للديره . فقال نعم متى

ودك نروح . قالت الحين اذا ما عندك شغل . فقال لها وش معنى الحين

فقالت له أبي أبشر أمي وأبوي وعمي وعمتي بأني حامل تراهم يفرحون

فقال لها على أمرك يا غلاتي . بس تطيعين شوري . قالت أفا . كيف ما

أطيع شورك أموت ألف موته اذا عصيتك ولو مره واحده . فقال لها يسلم

عمرك ويخليك يا حياتي . لازم ما نسافر إلا بعد ما تحسي أنك بحاله

طيبه وتقدري تسافري . فقالت آآآيه أقدر اسافر وش يصير فيني يعني .

قال لها الحمل في بدايته لازم ينحافظ عليه بالهدوء التام وعدم الحركة

المفاجئه أو شيل حاجة ثقيله أو الجلوس مدة طويله . والسفر يبي له جلوس

في السياره وقت طويل والديره ماهي قريبه . خلي السفر بعد شهر أو

شهرين حتى نطمئن على صحتك وصحة اللي في بطنك . فتبسمت

ووضعت يدها على بطنها . مدت يدها لرأس غالي فقرب منها وعرف

وش تبي فقبلت جبينه وهلت العبره سريعه . فقال وش فيك الله المتسعان

قالت ما فيه شي بس فرحانه ومع التعب حاسه أني ؟؟ مدري وش اقول

افكار تجي وتروح . قال لها وش هالافكار الله يهديك . قالت أول شي

تعرف أن هذا اول حمل وأنا خايفه . وثاني شي معقول يبي يصير عندي

ولد أو بنت آلاعبه وأداعبه واصوت له وأقوم واطارده وأتسلى بيه . هذا

شعور رائع يا غالي رائع رائع . فقال لها مداعبا ومازحا ومسليا لها فهو

يعرف ما بها من ضيقة النفس والخوف والوجل وطبعا هذه أمور عاديه

تصير لبعض النساء . قال لها آآآيه تبين تملين البيت بزارين ؟؟ والله

المستعان أخاف ما عاد ألقى مكان أنام فيه من بزارينك . فضحكت وقالت

ويسير تصوت لهذا وتقعد هذاك وتطق الاخر وأنت مبتلش فيهم . وانا

اناظرك واضحك عليكم . فقال لها والسعادة تملآ قلبه . آآآيه أن شاء الله

وانتي طيبه معافاه تملين علينا دنيانا بوجودك وجوك الرائع البهيج .

فقالت له تسلم يا حبيبي الله يسلمك ويحفظك ويخليك لعين ترجيك . المهم

متى نسافر . قال لا تخافي السفر على أمرك بس بالاول تكوني مرتاحه

وتقدري وتتحملي السفر . قالت مافيني شي يستاهل كل هذا . قال لا .

انتي حامل والخوف عليك كبير . ما أطيعك . لازم تكوني في حال أحسن

من هذا وبعدين السفر لاحقين عليه . وبعدين لازم أخذ رخصه من عملي

قبل السفر بكم يوم على شان ما نستعجل ونعود بسرعه نبي نجلس بالديرة

عند الاهل كم يوم خاصة وحنا مبطين منهم وهالخبر الحلوو ونخليهم

يفرحوا به . قالت والله يا غالي وغلاك في قلبي ما عاد أقدر اصبر ولو

يوم واحد . قال لها على شان خاطري يالغلا . هوني على نفسك وعلي

ترين العجله شينه الله يهديك . قالت على أمرك ما أخالف لك أمر حتى

ولو أموت بسبب طاعتك . قال تسلمي .

**********

مر شهر وكأنه سنه على رفعه . وأصبح مدة الحمل حوالي ثلاثة أشهر

أو اكثر بقليل . وعند عودت غالي من عمله ناظرته ولم تتكلم ؟ قال

عارف وش في نفسك تبغين الروحه . قالت والله أنها هي . فقال أبشري

انا أخذت اجازه اليوم لمدة اسبوع من يوم السبت الجاي واليوم الثلاثاء

وبكره أبي أعود بدري وأنتي تجهزي وجهزي أغراضنا وشنطنا الله

يحفظك على شان اذا عودت بدري نمشي على طول .. قالت ان شاء الله

وفي اليوم الثاني مشوا متوكلين على الله الى ديرتهم المباركه والأمل

يحذوهم فرحة أهلهم وذويهم في الديره فحمل رفعه شي مفرح للجميع

وصلوا الى الديرة وقبل الوصول الى البيوت قالت رفعه أي البيوت ننزل

فيه اول . فقال وش رايك انا عارف أنك ما تصبري على شان تعلمين

أمك بالخبر . قالت والله لو أقدر اصوت لها الحين لأصوت . قال كلك

نظر يالغاليه وش تأمرين أنا حاضر . وكان غالي يحب يشوف وش

تقول زوجته الغاليه ورفيقة عمره هل هي تقدره وترفع من قيمته وتجعل

له مكانه واحترام وتقدير أم تفضل مصالحها ورغباتها الخاصه على

شخصيته ورفع مستوى كرامته عند الجميع . فقالت أبشر بالسعد يا أبن

العم والله ما تكون عندي قليل . اول ما نوصل بيت أهلك فأنت الرجل

وبعدها اذا سمحت لي أروح لبيت أهلي . فمد يده من وراءها وضمها

إليه وقبل رأسها وشكرها . فقال آآآيه بنت العم تسلمي هذا اللي بغيته

الله يحفظك ويرعاك .

**********

وصلوا لبيت ابو غالي وسلموا عليهم على والده ووالدته وسلمت رفعه

أيضا مثله . وجلسوا ولم تكلم رفعه بشي تقديرا لغالي . فبشر غالي والده

ووالدته بالخبر السار بأن رفعه حامل . وفقام أبو غالي وأخذ بندقيه لديه

وأطلق عدة طلقات في الهواء اشتبشارا وفرحا بذلك الخبر . فسمع أخوه

تلك الطلقات وعلم أنها من أجل خبر سار فأخذ بندقيته وأطلق عدة طلقات

مثل أخوه وأقبل الى أخوه يبارك ويهني بعودة غالي وزوجته وبذلك الخبر

السار الذي من أجله أطلقوا الطلقات . وقد سبقته زوجته أم رفعه سريعا

لما رأوا سيارة غالي وصلت ولم يكن بيتهم بعيد . سلم ابو رفعه عندما

وصل على غالي وعلى رفعه وعلى أهل البيت وكذلك سلمت أم رفعه

على الجميع وبارك وهو لم يعرف الخبر تماما فقال ابو غالي أبشرك

رفعه حامل وان شاء الله يجي لها ولد نفرح به ونسعد . فقال والدها

الف مبروك وعساها ان شاء تجيب العيال ونفرح بهم . فقال ابو غالي

بوجودك يا ابو رفعه الله يحفظك .

**********

بقوا غالي وزوجته رفعه في ديرتهم وعند أسرهم اسبوع وقبل نهاية

الاسبوع بيوم عادوا الى المدينة وحضر غالي في مقر عمله وكان لا يغيب

كثيرا عن بيته وزوجته رفعه الحبيبه . ومرت الايام وأكملت رفعه مدة

الحمل بيسر وسهولة ودون أي مضاعفات أو آلام أو مشاكل حمل

وأصبحت قريبة الولادة ويترجى غالي ذلك الحدث السار بكل شوق

وفي منتصف أحد الليالي أحس بتألم زوجته وأفاق من نومه على حركتها

وقال لها عسى ما شر يالغاليه وش فيك . قالت مدري أحس بآلام مدري

وش هي قال نروح للمستشفى قالت لا ما في خلاف ان شاء الله . قال

أجل أبي أقوم اسوي قهوة وأجلس معك يمكن ترتاحي بعض الشي

قالت أنا اسوي قهوة لك . قال لا ما أبيك تقومي ولكن كل ما حسيتي

بألم قومي وأمشي في البيت ترين المشي يريحك شوي وما تشوفي

شر . قالت الشر ما يجيك يا ابو ..؟؟ .. إلا وش تبي تسمي ولدك ان شاء

الله اذا جاك ولد . قال خلي الاسم الى ذاك الوقت ما حنا عجزانين في

الاسماء . قالت إلا قل وش تبي تسميه . قال أن جاء ولد أبي اسميه

عبدالله . قالت وان جت بنت قال أبي اسميها . فقاطعته وهي تبتسم

تسميها غاليه . قال والله العظيم انه هذا اللي بنفسي وتم يا أم الغالين

ان شاء الله . قام غالي وسوا قهوه وجابها وجلس بجانب رفعه وتقهووا

ولكن أين .. والآلام لم تجعل رفعه ترتاح وقد قارب آذان الفجر . وبالعفل

نودي لصلاة الفجر . فقام غالي للصلاة وبعد الصلاة تفقد حال

زوجته فاذا هي غير مستقره فقال لها يالله يالحبيبه قومي نروح للمستشفى

احسن وانتي باقي تقدرين لا تتعبي أكثر وما أقدر اشيلك . فقالت ممازحه

ههاه ؟ ماتقدر . فضحك وقال لها أقصد أخاف عليك تتعبي يالله توكلي على

الله خلينا نمشي . قامت رفعه وخرجت مع زوجها وهي في حالة تعب

وإجهاد . وصلوا المستشفى وأدخلها لعيادة الطوارئ المخصصة لمثل

هذه الحالات . وبالطبع لم يسمح له بالدخول . وصار حاله شديد

الخوف والوجل على زوجته خاصة وهي لم تجرب . فاذا بمرور أحدى

العاملات في المستشفى تمر بجانبه داخله لقسم الطوارئ . فقال لها عفوا

يا أخت قالت له نعم قال تعملين هنا انتي قالت له نعم انا دكتورة أعمل

هنا في هذا القسم . فقال لي زوجة بالداخل عندها ولاده وخايف عليها

ممكن تساعديني وتطمنيني عليها الله يحفظك قالت له ابشر وش أسمها

فقال لها اسمها رفعه . فقالت لا تخاف هذا قسم الطوارئ الخاص بطوارئ

الولاده وهم شديدي الحرص على كل من يأتي إليهم وان شاء الله ما

يسير إلا الخير بأذن الله . فقال بوجهك الخير تسلمي بارك الله فيك

دخلت وبحثت عن المدعوه رفعه فوجدتها . ولكن ؟؟

كونوا معي في الجزء الرابع .. مع كل الامنيات