عبدالله العطافي :
ليت ابو نايف خويي يحقق لي طلب
والله انه رجل نشمي وانا صاحب عشم
كلها ثوبٍ لبسته ومن يدك ذهب
والعذر مطلوبنا اليوم يالقرم الأشم
الشفق :
مرحبا ترحيبةٍ من هنيا لا حلب
بالسنافي اللي تعودت من شخصه الكرم
اطلبك عندي أمر دون ماهو ينكتب
والوعد لازال صاحبك فينه ملتزم
عبدالله العطآفي :
لا مشاريه اقتفيها ولا عندي عتب
واعتبرك اخوي ولا ولدعمي لزم
ما نبي لونٍ مميز ولا نطلب لقب
واستحي من لا كبيرة بعد كلمة نعم
الشفق :
حتى لو مابيننا لا قرابه ولانسب
مانعدك غير حامل جمايل لا عدم
طالما انك للشفق بالجمايل منتسب
في الشهر يكفي الشفق منكم شخطة قلم
عبدالله العطافي :
انتم اهل الشعر واهل الفصاحة والأدب
والعلم يزداد فخرا اذا خاوى علم
والجمايل في النشاما تنسينا التعب
وابشروا منا بشخطة اذا ربي قسم
الشفق :
البعيد اللي من اول بحاضرنا قرب
راحت ايام الشقى يوم حفيان القدم
طالا الاقدار تجري علينا بالغصب
واهني اللي من اقدار دنيانا سلم
عبدالله العطآفي :
آه يابعد المسافات عن هاك العرب
لا تذكرني دخيلك دخيلك لا عدم
صاحبٍ هذي طبوعه اذا جيته ذهب
وكل ما ارسم. قلب ينبض رسم فوقه سهم
الشفق :
ما اكلنا من الفواكه سوى حب العنب
مثل طعم التمر لكن مافيها عجم
من درس علم المشاعر معنا انها رسب
بعد طا وله الفراق مات قلبه وانقسم
عبدالله العطافي :
لا تشب النار للصقر وتلم الحطب
وانت لو تذوق لحمه ترى ماله طعم
والمشاعر من درسها رسب والا كسب
من نجح يعلن نجاحه ومن يرسب ندم
الشفق :
اخر المشوار يالله فراج الكرب
اجعل الاجواد ي رب من حولي حرم
مثل ابو عادل شجاعٍ وفكاك النشب
صاحب الوقفات وبكلمته دوم التزم
صحّت الالسن شعراءنا الافاضل واهلاً بكل من حضر ,,
وتصبحون على الف خير ,,