ربٍ حمى الكعبة ومكه من الفيل
اهلك هل الباطل ومكة منعها
ارسل على جيش ابرهة طير ابابيل
ترميه بحجارة وفيله صرعها
ونفس الفتى تأمر. ب بعض الدواليل
ان كان. ما عنها بنفسه ردعها
كم واحدٍ جرّت عليه الغرابيل
من طاعها في غيها ما رفعها
للصقر وكر وللحديا مداهيل
الصقر فوق وذيك مع مجتمعها
والناس كلٍ في طريقه عراقيل
احدٍ سلم. واحدٍ حياته دفعها
وان كان ماتقدر لبعض المواصيل
الكلمة اللي ما تجملك دعها
ترى السكوت افضل لبعض الرياجيل
من كلمةٍ عيبٍ على من بدعها
سقط الكلام وكثرة القول والقيل
كم جر شر وكم علاقة قطعها
اما كلامِ يرفع الراس لن قيل
والبعد عن شوك الكبود وجعها
حتى نقفّل باب عوجٍ مقابيل
ما عاد يرجى فايدة من سنعها
كلمة غشيمٍ من صنوف المهابيل
عيبٍ عليه وتوجع اللي سمعها
ليته تركها ما لحقها بتحليل
والا قبل تأصل لسانه بلعها
والأدمي نهار جمع المحاصيل
يندم على اللي فاتته ما زرعها
اما ندم على دراسة وتحصيل
والا على ثروة نسي ما جمعها
وأكبر ندم ساعة توفى المكاييل
على سجود وركعةٍ ماركعها