[سهم المحبه]

الجزء العشــــــــرون :

فقالت ساميه أنتظرني ابو احمد فقال يالله ألحقي ...
فقالت لأولادها اللي يبي يمشي معنا يجي فقالوا
لا يايمه نبي نجلس هنا .. فقالت الصغيره انا ابي
اجي مع عمي يايمه .. فقالت لها امها يالله الحقيه هذاك
هو قدامك فجاءت الصغيره تجري حتى أمسكت بيد
عمها .. ولحقت أمها وأمسكت بيده من الجهة الثانية
وهو بينهما والابتسامات والسعادة تغطي جوههم وحياتهم
سعداء مسرورين ..
عادوا الى بيتهم وفي طريقهم اخذوا عشاهم ووصلوا
البيت وتعشوا ونام الجميع ودخل ابو احمد الى غرفة
نوم زوجته فاذا هي واسعة ومرتبه وليست كما دخلها
اول مره الستائر مغيره ونفس غرفة النوم مغيره وريحة
البخور والطيب تملآها فقال لها وش ذا الحلى . فقالت
حلاك يا راعي البيت كله هذا جا وأياك وقت ما جيت
ويا هلا بك ويا هلا بساعة جابتك نورت علينا بيتنا
وملآت حياتنا سعادة وسرور .. فقال أسعدكم الله وبارك
فيكم ما سويت شي واللي صار حق من حقوقكم عليه
فقالت تسلم بارك الله فيك وعسانا ما ننحرم من وجودك
وحنانك .. قضى ابو احمد وزوجته ساميه ليلة من احلى
الليالي حيث كانوا يتسامرون ويتكلمون فيما بينهم وما
يهمهم وفي المستقبل الجميل ان شاء الله.. فقال ابو احمد
تعرفي أنك الزوجة الثالثة .. ففزت وقالت وش تقول
يا ابو احمد لا تبلاني الله لا يبلاك .. فقال لها وش ابلاك
به فقالت انا عارفه انك متزوج ولكن زوجه واحده أكون
الزوجة الثالثة .. فقال فعلا انتي الزوجة الثالثة وأولادك
الجيل الرابع اللي سيعيش في بيتي واكون مشرف على
تربيته .. فقالت وين عايشه زوجتك ذي اللي تتكلم عنها
ما عمرك أطريتها لي .. فتبسم ابو احمد وقد تضايقت
ساميه وخافت وتغير لونها .. فقال لها ذيك وحده
تزوجتها وعندها خمسة اولاد وعاشت معي سنه وكم
شهر وطلقتها وراحت في سبيلها الله يستر عليها ما عاد
لي بها صله .. فقالت اشوى وكانت قريبة منه فوضعت
رأسها في حجره لبعض الوقت وعندما رفعت رأسها
شاف عيونها بها دموع .. فقال لها وش فيك .. فقالت
له أنت ما يصير تشارك فيك وحده وعندك زوجه تحبك
وتقدرك .. فقال لها تسلمي بارك الله فيك .. انتي الخير
والبركه .. فقالت لولا ان زوجتك الحاليه ماهي أم
عيالك ما قبلت ان تشاركني فيك .. فقال كلا له مكانته
ولا احد له دخل من غيره .. فقالت ليش ماتوديني لها
اسلم عليها واتعرف بها .. فقال قريب ان شاء الله تجي
بيتها وتشوفيها وتشوفك وتتعرفوا على بعض .. لا
تستعجلي .. فقالت على كيفك .. فقال ليش بكيتي
فقالت أحبك يا عمري ولا ودي احد يشوفك او تعرف
غيري ولكن مشيئة الله حكمت ان يكون لك زوجة
أخرى .. فقال كوني عاقله تري العقل ميزان النفوس
فقالت ساحر وشاعر بعد .. فضحك وضحكت ساميه
من ضحكته وقالت تسلم حياتك دوم سعيد ومسرور .
فقال لها في وجودك ان شاء الله دايما .
******
في اليوم الثاني ذهب ابواحمد الى مكتب عقار مع الولد
الكبير وكتبوا عقد بعد ان تم دفع الاجرة المتفق عليها
وذهب وبدأ في التأثيث .. وبعد حوالي اربعة ايام تم
الانتهاء من كل شي نقل ابو احمد اثاث بيته السابق الذي
يحتاجه وباع ما لا يحتاج او رماه..وانتقل البيت بالكامل
وفي مساء ذلك اليوم قال لزوجته ام احمد ترين أبي
اسوي عشا وتجيك ساميه هي واولادها ويجون اخواني
ونتعشى سوى استعدي فقالت ابشر والله يخلف عليك .
ايضا قال لساميه نفس الكلام فقالت ليش ما كان العشا
عندي بما ان اهلك واولادك واخوانك يعتبرون ضيوف
على البيت كله فقال تسلمي ولكن انا راعي البيت والحق
عليه .. فقالت تسلم وعلى راحتك اللي تشوفه مناسب هو
اللي يصير .. فقالت متى بالضبط نطلع ما ابي اسبب
احراج او أزعاج .. فقال أأيه يالغاليه هذا اللي ابيه دائما
تشاوريني وانا اشاورك على شان ما نختلف أبي اروح
اقضي شغله واعود بعد ساعه ويكون الوقت بعد المغرب
واذا جيت تطلعي وانا معك على شان اعرفكم على
بعض والله يهديكم لبعض ويصلح شأنكم ..

راح ابو احمد وخلص شغله وعاد واذا بساميه تنتظره
واقفه . فسوى لها حركه من بعيد فضحكت وأغرورقت
عيناها بالدموع فقال لها ليش فقالت بعدين اقول لك وكانوا ابنتيها الصغيرات موجودات فقالت الصغيره
متى نطلع يا عمي .. فقال الحين يالله مشينا ..
طلع ابو احمد وطلعت ساميه بجواره كأنها الطاؤوس
تتمايل سعيده بزوجها الحبيب والبنات حوله . وطبعا
أعطى زوجته ام احمد خبر انهم جايين فأستعدت لأستقبالهم
ودخلت ساميه وسلمت على ام احمد وكل وحده
عيونها تتفحص الاخرى الله المستعان ..
فقالت ساميه أهلا بك ابو احمد في بيتك وأهلا بكل
أفراد أسرتك وحياك الله يا ام احمد بيتك ومطرحك
وتريني أختك في كل وقت وأنتي الاوله ولك المقام
الاول .. فسكت ابو احمد يريد يسمع ماذا تقول ام
احمد .. فقالت ام احمد وبك يا اختي وتسلمي بارك الله
فيك نسعد بك ويا هلا بك .. فقال ابو احمد حياكم الله
انتما الاثنتين وانتما الخير والبركه فعرف ابو احمد
بالاسماء وعرف بأسماء بنات ساميه وعرف بأولاد
ام احمد وبناتها وكانوا كلهم موجود وبدأ السلام من البعض
على البعض الاخر وجلس الجميع في صالة البيت
بالدور الثاني .. جلس ابو احمد مع الجميع وقدمت
القهوة أم احمد فحاولت تصبها ساميه ولكن ام احمد
رفضت واصرت انها هي اللي يقدم القهوة .. فقالت
ساميه اذا سمحت لي ابو احمد يتعشى الجميع في
بيتك الثاني فقال ابو احمد اسمح لك ولا يهمك ولكن
مو بكره في وقت ثاني اما أخر الاسبوع الجاي أو
في أي يوم بس مو بعيد يعني بعد يوم او يومين
وعلى حسابي وانا راعي البيت .. فقالت ساميه
أجل وش سويت انا .. فقال ابو احمد لا مشكله انا
راعي البيت مثل ما قلت لك ولا اقبل والجيب واحد
مافيه فرق فتبسمت ساميه وعرفت ان ابو احمد
يقصد مثل ما سويت عشى عند ام احمد للجميع
اسوي عشا عند ساميه للجميع كمساواه ..
******
قام ابو احمد رايح المجلس ليجلس مع اخوانه
وبقية اولاد ساميه .. وكانت عيون ساميه و
وام احمد تتابع ابو احمد ؟؟ والعلم عند الله ماذا
في خواطرهن ..
عاد ابو احمد بعد حوالي نصف ساعه لأخذ شي كان
يريده فوجد ام احمد وساميه يضحكون فقال ما تعطوني
معكم شوي .. فقالت ساميه كله لك ومن أجلك .. فقال
الله يزيد ويبارك ويكتب لنا كل خير .. وكان يفهم
على ساميه بعض الحركات وبعض الكلمات ..
وذهب وهو مسرور .. تم العشا وانتهى والحمد لله
وعادت ساميه الى بيتها ونام الجميع وكان ابو احمد
يتنقل في النهار هنا وهناك ولكن المبيت يبات ليله
هنا وليله هناك وبعد ثلاثة ايام كان يوم خميس
الظهر قالت ساميه يا ابو احمد فقال قبل ما تكمل
كلامها الليله وابشري بعزك فضحكت وجرت يمه
وحظنته ودمعت عيونها وقالت ما تخليها تطب
الارض تلقطها وهي طايره .. فقال ابشري بالخير
فقالت وش اسوي انا هنا فقال قهوة وشاي وانا
راح اجيب لك كل اللي يلزم والعشا مثل عشانا
اللي فات ففهمت عليه وقالت الله يخلف عليك
يمكن بناتك يجون فقال بغيت اقول لك تقولي
لهم ولكن ما دام يبون يجون حياهم . فقالت
الله يحييك وتسلم يالغلا .. جاب ابو احمد كلما
يلزم من التقديمات وجهز العشا كما قال فحضرن
البنات المتزوجات .. وسووا له مقلب أو بالاصح
حركه مضحكه مفرحه ممزوجة بمزحه ..
وهي أنهما لبسوا ثياب بيض وشمغ وعقل وتليطموا
واقبلوا عليه أثناء دخوله .. فضحك وقال بس ما عرفتوا
رجولكم فضحتكم .. فنظرن فاذا اظافرهن بها مناكير
فضحكن وضحك عمهما وضحكت ساميه بشده وقالت
هذا ما احد يقدر عليه فارس ولد فارس الله يحفظه ..
فقالتا البنتين الله يهدي سركم ويحفظكم ..
******
قالت البنتين يا عمنا نبي نطلع عند عمتنا اللي فوق
نسلم عليها وننزل معها وهي نازله .. فنظر في ساميه
وهي تبتسم فقال بيض الله وجوهكن يا صبايا هذا طريقة
الكرامه واهلها .. ماشي ابي اقول لها على شان تستعد
واقول لكما اذا جهزت تطلعون تنزلونها وتسلم افكاركما
طلع ابو احمد وخبر ام احمد وقالت يا هلا بهم .. عاد
وقال متى ما بغيتوا تطلعوا مافيه مشكله ام احمد جاهزه
فطلعن البنات وطرقوا الباب ولم يدخلوا تقديرا لمن
بالداخل فأقبلت ام احمد وقالت يا هلا وارحبوا ..
فتقدمن البنات وسلمن على ام احمد وقالن حنات
بنات ابواحمد ان شاء الله ترحبين بنا .. فقالت
ارحبوا ويا هلا ومرحبا .. فقالن لها تفضلي يا عمه
انزلي جينا نرافقك في نزولك . فقالت تسلمن بارك
الله فيكن هذا من طيبكن .. بعض الامور بل اكثرها
كان من رأي ساميه فهي تبي تضفي على البيتين شي
من الاريحية والاطمئنان وجعل الجميع يكون في راحة
وسعاده .. وعلم ابو احمد بذلك فأسعده وحاول ان
لا يظهر لساميه علمه بذلك ولكن احيانا لا بد ان يقال
للمحسن أحسنت وينهي المسيئ عن أساءته ..
وكان ابو احمد يراقب كثيرا من التصرفات عن بعد
وكأنه لا يعلم او لم يرى ما يحدث .. المهم وصلن
بنات ساميه وضيفتهن كما يفكرون الى البيت السفلي
وكانت ساميه في الباب مستقبله وهلت ورحبت بأم
احمد اجمل ترحيب وقالت اهلا بأختنا ويا مرحبا
تري البيت بيتك وانتي من أهل البيت ومكانك
ومطرحك ويا هلا ومرحبا بمن قدم ..
فقالت ام احمد وبك الهلا والرحب تسلمي بارك الله فيك
ويطيب البيت بأهله .. وقبل ان يجلسوا وصل ابواحمد..


كونوا معي في الجزء القادم ...