الجزء الثالث والعشرون :
خلي ام احمد تطلع ترتاح تراها تعبت وانا مرتاحه
وما ينقصي شي . وتراني قلت لها ولكن رفضت .
فقال الله يسلمك ويسلمها ويبارك فيكم .. خليها على
راحتها .. من بكره انا اللي راح أتولى الخدمه ..
أخذت إجازه كم يوم .. فقالت احلف .. طبعا لقولها هذا
سبب .. سنعلمه فيما بعد .. فقال تشوفيني عندك ما
اروح الدوام عندها راح تصدقين .. فقالت الله يعافيك
وبالفعل شكر ابو احمد ام احمد وقال لها الله يجزاك خير
روحي لعيالك وعشيهم وارتاحي وانا اشوف وش تحتاج
ساميه واسويه لها .. فقالت ام احمد مازحه وضاحكه انت
ما تعرف طلبات الحريم .. وخر وريح روحك .. فقال
ليه نسيتي يا ام احمد وش سويت لك وانتي ما عندك
احد .. فتبسمت وقالت لا والله ما نسيت ولا أنسى خيرك
سابق والله يجزاك خير . فقالت ساميه وش مسوي ابو
احمد .. فقالت الله يجزاه خير ما خلى شي ما سواه وكان
اقرب لي من أعز ناسي واهلي وخدمته لي ومساعدته
لي في كل الاوقات ولما اكون تعبانه على وجه الخصوص
فتذكرت ساميه الكثير من الاشياء اللي يعملها ابواحمد
وتذكرت حكاية المويه في اول لقاء له بها لما خرج
عنها على شان تأخذ راحتها والكثير من الاشياء التي
يعملها بذكاء وفهم . فقالت الله يوفقه الخيير من الناس يلقى من ربه
الخير والبركه .. بقيت ام احمد بعض الوقت وعند
خروجها قالت لساميه اذا احتجتي شي اتصلي عليه
عندك التليفون ولا تستحي تريني مثل اختك ولا تفشليني
ينقال ام احمد عندها ما سوت لها شي .. فقالت الله
يسلمك ويرعاك.ما تقصري وانا ان بغيتك اتصلت عليك
بقي ابو احمد وقام يداعب الصغيره ويحبها ويتكلم معها
بصوت مسموع وهذه الطريقة معروف الكلام ليس
موجه لها ولكن للذي يسمعه .. فكانت ترد عليه ساميه
محاتاه وهو يبتسم .. أتصل على أم احمد وقال بكره
انا راح اسوي حليب لساميه لا تستعجلي وتقومي ..
سوي لها كمون وفتيته وجيبيها الساعه عشره والساعه
ثنتين جيبي لها المسلوق وبعد العصر سوي لها شوربه
وفي الليل اللي تختارين انتي فقالت له ابشر .. فقالت
ساميه ليه ما تبيها تنزل فقال لها مو هذا قصدي ولكن
هي تعبت اليوم وابيها ترتاح وانا اكفي هنا واخذت
إجازه من شان اكون بقربك .. فقالت وين بقربي وانت
هناك بعيد عني وكانت تمزح .. فقال ماني بعيد وان
كان يفصلنا مسافة بسيطه فأعيش بالقلب معك في كل
مكان .. فتبسمت وهي تحس بألم بين فترة وأخرى
فقال لها أخذتي مره محلوله .. فقالت وش عرفك بالمره
فقال هذا علاج لكل شي وخاصة عن الرياح .. فقالت
أيه ما قصرت ام احمد جابت لي وهذا هو في قارورة
الماء اللي جنبي أخذ منه بين فترة وأخرى لا تخاف
عليه تراني بخير ولله الحمد .. فقال يدوم الحمد ..
نام ابو احمد قريبا من ساميه بعد ان وصاها ان بغت شي
تقومه .. وفي الصباح قبل الاشراق قام وسوى حليب
وجابه وخلط لها كأسه كبيره من الحليب والعسل
وقدمه لها وشربت الكاسه كامله وهو يتابعها حتى
خلصتها وقال لها بعد ما ترتاحي يعني بعد كم يوم
تشربي العسل مع الحليب باردا وتستمري عليه أقل
شي عشرين يوم كل صباح .. فقالت ان شاء الله .
******
وحوالي الساعه سبعه صباحا طلت أم احمد وهي تقول
يا أهل البيت فقال ابو احمد تعالي الجميع صاحين
أرحبي وسلمت وقدمت تمر محموس بسمن بري
مضاف إليه ثفا (رشاد) وقهوه وكمون وتمر عادي
مستقل .. فقال ما قلت لك لا تتعبي حالك وتقومي بدري
فقالت قل ما تبيني اجيكم أقوم اروح .. فضحك وقال لا
والله مو ذا قصدي ولكن ما ابيك تتعبي كفاية تعب امس
وساميه هذا انا عندها ..فقالت ام احمد وانت من يقهويك
فقالت ساميه لترفع الحرج تسلمي يالغلا الله يرفع قدرك
البيت بيتك والساعه اللي تنوري فيها هي الساعة المباركه
بس ما ودنا نتعبك وما قصرتي فقالت ام احمد خلوني
على راحتي وان شاء الله ما فيه تعب ..
******
مرت أربعة ايام وفي اليوم الخامس أصبحت تقوم ساميه
وتخدم نفسها وكانت أم احمد ما تقصر وخاصة مع
الصغيرة تغير لها وتقوم بكل ما يلزمها .. لم تنتبه
ساميه ان فيه في درج الكمدينه شي لم تراه .. وأثناء
قيامها بأخذ شي من ذلك الدرج شافت هديه ملفوفه
وعليها إهداء جميل جدا ورومنسي .. ففتحتها واذا
فيها طقم ذهب وتعليقه مكتوب في وسطها امل
وكذلك كف صغير وحلوو للصغيره وحلق .. وبجانبها
عطر جميل ورائع جدا..فقبلت كل تلك الاشياء واسعدها
جدا الطريقة والاختيار ..وقد كان ابو احمد خارج البيت
لجلب بعض الاشياء للبيت .. وعند عودته لم يكن عندها
أحد فسلم لما دخل وقال كيف حال الحلووين فقالت بخير
سلمك الله .. فأقترب وقبل الصغيره آمل .. وقبل الام
على جبينها وكانت مسترخيه .. فأمسكت بيده وقبلتها
وقالت تسلم الله يبارك فيك ويعطيك العافيه أبي اقوم
ساعدني فقامت وذهبت وعادت وكان ابو احمد واقف
ينظر في الصغيرة ولم ينتبه لعودتها فأحتظنه من خلفه
وبشده وشكرته على الهديه وقالت تسلم اختيارك يخبل
فقال تستاهلي وأهم شي انك بخير وعافيه .. فقالت ما
تخليك من الحركات اللي تجيب الاضطراب الحسي
فقال هذا طبع ما اقدر اخليه ولا أعرف طريقة غيره
فقالت والله العظيم اني لما شفت اللي جبت طلعت
دمعتي وانا مبتسمه وقبلت كل الاشياء اللي جبتها وكاني
اقبلك الله لا يحرمني منك .. فقال الله يسلمك وما سويت
شي .. فكرت وفكرت كثيرا في ابو احمد خاصة وهو
مهتم بالكل وليس ناس عن ناس وما يقصر وكانت
حالته الماديه ضعيفه بعض الشي ما عنده غير راتبه
فقررت شي في نفسها تنفذه فيما بعد .. ولكن لم يأتي
وقته بعد .. وتتالت الايام واكملت البنت سبعة ايام
فجاب ذبيحه وعزم اخوانه وبنات ساميه وبقية أهل
البيت فأحتفلوا بتمايم الصغيره أمل وبقي حول ساميه
حتى تعافت وشدت حيلها وعاد لعمله وساميه اصبحت
بخير وبنتها ايضا بخير .. وكل شي على ما يرام
******
وفي أحد الايام قالت ساميه
لو سمحت يا ابو احمد ودي تشري لي سيارة فقال
هاااه لويش السياره وش تبين بها فقالت لو ما أبيها
ما قلت لك اشري سياره . فقال ابشري اختاري النوع
اللي يعجبك ويتم طلبك ان شاء الله .. فقالت انا ابي
السياره اشريها من حلالي وأبيك تختار انت لي النوع
اللي يصلح وتكون من النوع الممتاز .. فقال ابشري
أشار عليها بنوع معين من نوع ونيت كونها تصلح لكل
الاحوال مثل السفر الخروج للبر وعند جلب ذبيحه مثلا
او اسطوانات غاز او تحميل عفش أو أي شي .. فقالت
شوف كم قيمتها فقال لها قيمتها كذا كذا .. فقالت خير
اجيب الفلوس وتروح تشريها لي الله يحفظك .. فقال
خير ان شاء الله .. فأحضرت الفلوس وقالت توكل على
الله وجيب السياره .. كان مستغرب ابو احمد من البداية
وش تبي بالسياره وبأسم من وماهو فاهم الحكايه ..
فقال لها الحين اخترنا السيارة وجات قيمتها .. و..؟؟
فقبل ما يكمل قالت السياره بأسمك وهي هديه مني لك
فقال تسلمي والله يخلف عليك .. ولكن هذه كبيره سياره
مرة وحده .. لا لا ما أقبل .. فقالت اذا ما قبلت تزعلني
وما اقدر ازعل عليك بس أخذ في خاطري وما أبي احد
يعرف اني دفعت قيمتها .. فقال بعد ما تبين احد يعرف
فقالت لا .. فقال طيب والفلوس وش وضعها .. فقالت
أعرف طبعك الفلوس من حلالي الخاص ولا دخل من
حلال اولادي شي ابدا .. تطمن الله يحفظك .
فقال خير ان شاء الله .. مر يومين ولم يحدث شي فقالت
ساميه يالغالي وين اللي قلت لك فقال سمي وشي تأمري
حاضر .. فقالت السياره وش سويت في موضوعها .
فقال الحقيقه ما ودي اكلف عليك اولا وبعدين سيارتي
ماشي حالها . فقالت بيعها وأرفع قيمتها وهديتي لازم
تقبلها .. فقال ابشري بس مو الحين .. فقالت متى يعني
فقال ان شاء الله قريب .. إلا كم لك من جبتي الصغيره
فقالت لي الان تقريبا أكثر من ثلاثة اسابيع .. فقال ان
شاء الله أخر الشهر هذا .. فناظرت فيه وعرفت قصده
وتبسمت .. وفي أخر الشهر جاب السياره بدون ما احد
يدري وطبعا مر بها الى مشحمه وغسلها وطيبها ووقفها
عند الباب .. ودخل وبدون ما احد يشوف السياره او
يعرف .. فقال لساميه ودي أطلع انا وأنتي مشتاق لك
تكوني معي..فقالت غالي والطلب رخيص ابشر اعطني
نصف ساعه واكون جاهزه فقال لها وآمل معك خذيها
فقالت اخاف عليها من الهواء فقال أصبحت كبيره لها
شهر ونصف ما يجيها شي ان شاء الله .. تبسمت ساميه
وخامرها بعض الشك في أمر توقعته . جلس ابو احمد
في المجلس واشغل نفسه حتى جهزت .. فأتت وكانت
على غير طبيعتها وظهرت بمظهر وكأنها رايحه لعرس
فنظر إليها ابو احمد طويلا وهي بهذا الحال وقام وأخذ
الصغيره ومشى يتقدم ساميه وهي خلفه الى ان
وصل الى ....
كونوا معي في الجزء القادم ...