الجزء الخامس والعشرون :
ودي .. وسكتت ؟ فسمع ابو احمد صوتها وكأنها تبكي
فقال ساميه وش فيك عسى ما شر اشغلتيني فيك شي
اجيك .. فقالت لا لا .. مافي شي بس .. خلني اكلمك
بعد شويه .. وقطعت الخط .. فقام بالاتصال بها وقال
اذا في شي اجي حالا ليش تبكين وش فيك .. فقالت والله
ما فيه شي بس اخذتني العبره مدري ليش .. اسمع فقال
كلي سمع واسمعك حتى بقلبي يالغاليه..فقالت ..وسكتت
مرة أخرى ولكن عاودت وتكلمت وقالت ..
{ودي أزوجك}
فنزل الخبر على ابو احمد كنزول الصاعقه .. وضحك
ثم قال لها أنتي مجنونه .. فقالت لا كلي عقل .. فقال
وش هالكلام اللي تقوليه .. أنا ما كان في خلدي حتى
التفكير اني أسمع مثل هذا الكلام منك بالذات .. فقالت ولا أنا ولكن
في نفسي شي ودي احققه .. فقال خلي الخرابيط اللي
ما تودي ولا تجيب .. ولا عاد اسمعك تقولي مثل هذا
الكلام .. فقالت لا تحسب اني مفرطه فيك والله لو تروح
في اخر الدنيا ما انساك ولا افكر حتى في نسيانك ولكن
مثل ما قلت لك في نفسي حاجة ودي احققها الله يخليك
لا تكسر في خاطري وترفض رغبتي .. فقال لها يا بنت
الحلال مدري من وين جبتي هالكلام وحتى الفكـــــره
ماهي معقوله .. الظاهر انك قمتي من نوم شفتي كابوس
وماسك معك .. فضحكت وقالت لا والله انا لي فتــــرة
طويله وودي اناقشك في هذا الامر ولكن ما قـــــــدرت
اختار الوقت المناسب وكنت اقول في نفسي أنتظــــر
قد تأتي فرصة مناسبة ولكن تأخرت الفرصة فقررت
افاتحك في هذا الموضوع .. فقال لها وما اخترتي إلا
هذا الوقت وانا في العمل .. فقالت وانت جنبي حاولت
كثير من المرات وما قدرت لغلاك عندي وانت تعرف
الحريم ما تقبل الضره ابدا ولكن نفسي وما تريد الله
يحفظك .. فقال لها خلاص اذا جيت يصير خير مع اني
ما راح اوافق ابدا .. يالله انا عندي شغل الحين خليني
اخلصه والله يجيب العواقب سليمه ..
******
عاد ابو احمد وعندما دخل سلم وغير ملابسه وجلس وكانت تنظر إليه بشكل غير المعتاد فلاحظ ذلك عليها
ولكن لم يقل شي .. أحضرت له الغداء وتغدى وبعدها
طلب كاسة شاي وجلس فأتت الى جواره وجلست وهي
ساكته وظنته ينتظرها تتكلم .. فقال في المساء ان شاء
الله نتكلم .. فقالت على راحتك .. نام بعض الوقت وقام
وقال عندي شغل ودي أروح اسويه تبون شي فقالت
سلامتك .. عاد ابو احمد بالليل حوالي الساعه العاشره
وسلم وبعد ما بدل ثيابه وجلس في الصاله مع الاولاد
وكأنه يتهرب من الكلام .. فعرفت وجات وجلست
قريبا منه .. وبعد ما نام الجميع وكان ابو احمد وساميه
في غرفة النوم الخاصة بهما.. فقالت يا أبو احمد ماودي
أضايقك اذا ما تبي أتكلم خليها بعدين .. فقال هو فيه
شي نتكلم فيه ضروري .. فقالت نعم الموضوع اللي كلمتك فيه اليوم .. فقال الظاهر انك راح تشغليني بأمور
مالي فيها رغبه ولا أحتاجها .. فقالت طيب اسمع وترى
الرضى سيد الاحكام ..ما فيه شي بالغصب ولا بالاكراه
فقال عارف وبالاخص هذا الشي .. أنتي الظاهر فيك شي
او صابك شي الله يعافيك وش هالكلام الله يهديك من
من عقلك تتكلمي .. فقالت نعم .. قال أسمعي .. اولا انا
ماني صغير وهالامر يبيله شباب وأنا على وشك التقاعد
يعني في أخر الخمسين .. وش تقول الناس عني أنهبل
ابو احمد وتزوج في أخر عمره . .
فقالت أسمع كويس انك ذكرت العمروقلت انك كبير في السن
تراني اكبر منك وما راح اكون أفضل فيما يأتي من الوقت ..
وودي لك بوحده صغيره تراعيك وتدللك وتزهي حياتك
وتجدد صباك معاها ..فقال ومن أشتكى لك وبعدين أنتي
في نظري أحلى واجمل من الصبايا .. فقالت كل هذا
اعرفه واعرف مشاعرك تجاهي .. ولكن مثل ما قلت
أمنيتي ان اشوفك اسعد انسان تشوفه عيني .. وتراني
ما نسيت تضحيتك تجاهي انا واولادي وأعرف اني أم
ثمانية اولاد ساعة تزوجتني والان انا كبرت وأصبحت
فوق الخمسين بكم سنه وانت ما زلت تحتاج لدنيا تعيشها
فقال لها عندي بكره عمل من بدري يالله تصبحي على
خير ودي انام .. وقام الى فراشه متظاهر بالنوم .
فتركته .. وعند الصباح أفاق على فطوره الصباحي
فما كانت تتركه يروح عمله إلا بعد أن يفطر ويشرب
كاس من الحليب الساخن وكانت تهتم به تماما وبلباسه
وطيبه .. وكان سعيدا معها وهي كذلك ..
******
تعددت محاولات ساميه مع ابو احمد حول الموضوع
الذي كلمته فيه لكنه كان يتجنب الحديث معها فيه
وحاولت أكثر من مره وكان ينهي الحديث اما بالخروج
او بالنوم أو يتواجد مع الاولاد او أحد مما يجعلها
لا تستطيع الحديث معه في ذلك الموضوع ..
ولكنها أصرت على ما في نفسها وتفكيرها ..
ذهب إليها أحد الايام وكان يوم خميس بعد العصر
فتظاهرت بالتعب ولم تقوم من الفراش فدخل عليها
وقال لها سلامتك عسى ما شر .. فقالت أحس اني
تعيبانه وودي توديني المستشفى لو سمحت فقرب منها
وقال الف سلامه لك ووضع يده على رأسها يتفحصها
وقال وش تحسين فقالت حراره شديده وتعب .. فقال
توكلي على الله اوديك .. فقامت ولبست ولكن لبسها ماهو
للروحة للمستشفى .. فضحك وخرج قبلها ولم ترى
ضحكته أو تلاحظ عليه ..المهم لحقت به وشغل السيارة
ومشى .. فقالت ترى مابي شي وبصحة وعافيه فقال
داري ولكن أحببت اطاوعك فقط وإلا ما تمشي عليه
فقالت الله يسلمك ويرعاك .. اسمع يا ابو احمد ودي
تخليني اتكلم حتى انتهي الله يحفظك ولا تقاعطني على
شان خاطري .. فقال تفضلي تكلمي في أي شي إلا
الموضوع اللي أشغلتيني فيه لك كم يوم ..
قالت اصلا ما فيه غيره وبالنهايه ما راح يسير إلا
برضاك وموافقتك .. فقال ما ودك نعود البيت أو
نروح البر نتسابق انا وانتي .. فقالت نروح نتسابق
وان سبقتك توافق وانت مغمض فقال اصلا ما راح
تسبقيني مهما حاولتي .. فقالت جرب وشوف انا بنت
باديه في الاصل واعرف كيف اسبقك .. فضحك وقال
لو تسابقنا راح اخليك تسبقيني على شان اشوفك تجرين
امامي قالت من زمان قلت لك انك ساحر قلوب ومدت
يدها ووضعتها على يده وقالت على شان خاطري اسمع
مني ونتناقش وان وصلنا لتفاهم وموافقة يصير خير
فقال يا بنت الحلال انتي انجنيتي وإلا أش السالفه .. الله
يهديك أتركي هالشي تري ما راح تصلي لشي بس
تتعبي نفسك .. فقالت تعبك راحه وتراك غالي ..
قال غالي وانتي تبين تجيبي لك جاره وش هالكلام
قالت اسمع بالاول وبعدين ردعليه فقال خلينا نعود البيت وبعدين نتكلم فقالت اذا تسمعني يالله نرجع واسوي
لك ذيك القهوة الزينه ونجلس نسولف .. قال يالله رجعنا
وكان قصده ان ليلته ماهي عندها ذيك الليله ويبي يفتك
وعند وصولهم قال لها يالله تصبحين على خير .. فقالت
والقهوة والوعد .. فقال بكره يسير خير انا رايح لأهلي
فوق الليله أبات هناك فضحكت وقالت ليه والبارح وين
كنت .. فقال هااااه الله المستعان قمت أخربط خلاص
جيبي القهوة .. راحت وجابت القهوة وتمر ومعمول
خاص بالتمر .. فلقته متلحف ومتظاهر بالنوم ..
فقالت قم يالغلا أدري ما بك نوم بس تبي الفكه مني
وسحبت لحافه ومسكت بيده وقالت بحقي عليك وغلاي
لا تحرمني من رغبتي ولا تحرجني اكثر تراك بهذلتني
وانا احاول معك . قام وجلس في المكان المخصص
للجلوس ومدت له فنجان القهوة وقربت التمر والمعمول
وقالت اسمع الله يخليك وخلني اكمل اللي ودي اقوله
لك .. قال تفضلي .. فقالت اولا انا اعرف وش اقول
وترى الموضوع جد الجد ماهو سواليف وهرج فاضي
اولا البنت المقصوده تقرب لي وبنت عم .. ثانيا لها
ظروف صعبه زوجها والدها من واحد الله يحفظنا
له مشاكل كثيره وسوابق وانخدع فيه وتورط بقبوله
زوجا لبنته .. وتعب حتى حصل على طلاقها منه
ورجع له المهر .. والبنيه صغيره وشابه وناعمه
واوصافها صعب ينوجد بهذي الايام .. وودي اشوفها
راعيت بيتك .. فقال واللي بالبيت وش هم .. فقالت
انا كبيره .. وام احمد كبيره مثلي كل واحده لها ثمانية
اولاد وتسعه .. وانت ما زلت تحتاج لشابه تتحلى بها
وتسعد نفسك .. فقال لها ومن قال لك اني غير سعيد
قالت طعني الله يوفقك تراني أترجاك وقبلت يده وهو
غافل عنها وترجته .. وقالت ان ما كان على شان
خاطري فعلى شان ما يضيع شباب هالبنيه والله أني
شفقانه عليها وودي اشوفها تحت جناحك وفي بيتك
فقال احس حالي تعبان ودي انام وبكره يصير خير
فقالت أكييد فقال ان شاء الله . قالت جعله نوم العافيه
بقى يتهرب منها حوالي اسبوع ما يخلي لها فرصه
تكلمه .. فكانت ليلتها فحاولت ان يكون عندها من وقت
مبكر ونسي السالفه .. وتم لها ما ارادت .. وعندما
صاروا لوحدهم فقالت يصير منك يا ابو احمد تتجاهلني
وتتركني وانا احاول الكلام معك وانت ولا على بالك
فقال وش السالفه مين قال اني اتجاهلك .. فقالت لي
الحين اسبوع وانا احاول افهم منك وش ردك عليه وانت
كأنك ما سمعت مني ولا حرف ..
******
فقال لها يا شيخه الله يهديك يمدينا نتكلم الحين ودي
اروح لرجال لي حاجه به واذا جيت يصير خير ..
قالت الليله ما تطلع إلا من فوق رقبتي ان وطيت عليها
ومستحيل اخليك تطلع .. فقال يعني أيه تمنعيني من
الخروج وإلا أش قصدك ..قالت أمنعك بأني اقول بحقي
عليك وغلاي عندك فقط أن طعت وإلا براحتك .. فقال
يعني تمسكيني باليد اللي توجعني وتعرفي أني ما ارد
لك طلب وانك غاليه عندي .. قالت اعرف غلاي عندك
ولك غلا مثله مرتين عندي .. يا ابو احمد ريح قلبي
فقال اريح قلبك بما يضرني .. فقالت ما عاش من
ينوي لك الضرر او يسببه لك .. فقال وش معنى
تصرفك هذا ورغبتك اللي ما اشوف لها معنى
قالت طعني وما راح تندم تكفى الله يخليك ويكتب
لك الصحة والعافيه وراحة البال ..
قال اسمعي ريحيني الان وخلي هذا الموضوع نناقشه
بعدين .. قالت متى تراني اصدقك وانت ما عمرك
قصرت معي بس هالايام اشوفك تراوغ .. قال
خلاص يوم الخميس نسولف ويسير خير .. قالت
بكره الخميس وش فيك ناسي وإلا أيه .. قال طيب
بكره ان عشنا .. وحاول يمضي الوقت دون الدخول
في النقاش في هذا الموضوع ..
وفي اليوم الثاني كان يوم الخميس طلبوا منه الجميع ان
يطلعوا للبر..فقال يالله مشينا وكان قصده يفتك من الوعد
ولكن وراه وراه وساميه مصره على رأيها .. طلعوا
للبر وفضلوا الى قريب العاشره ثم عادوا .. فقالت
أبيك تجيب لي حاجات ضروريه وناظرت فيه فعرف
انها تبي تكلمه في موضوعها اللي ما لاق لأبو احمد
فقال ان شاء الله اجيب لك اللي تبين .. فلما توحدت
به وقد جهزت له ما يناسب جلوسه .. أقتربت من
ومسكت بلحيته وقالت تراني اول مره امسك بلحيتك
وما قد سويتها ..
فنظر لها بغضب شديد وقال لها .....
كونوا معي في الجزء القادم ...