الجزء السادس والعشرون :
الحين انتي الظاهر ما ودك تتركيني إلا وإزعل عليك
اصحي لنفسك انا رافض الموضوع هذا وان كلمتيني
فيه مره ثانيه ما عاد ادخل عليك وتشوفي مني اللي ما
يعجبك تفهمي..وخرج غضبان.. وكان يتظاهر بالغضب
على شان يفتك منها .. خرج لبعض الوقت وعاد ودخل
المجلس بهدوء وبدون أن يحس به أحد وتليطم بشماغه
واخذ احد المساند تحت رأسه وانسدح وقصده ينام ...
ولكن ما درى وإلا غاليته بجواره تفرك رجليه وتتحس
أصابع أقدامه وبدون ما تتكلم .. فقال وش اللي جابك
قالت لا تضحك عليه أدري انك ما تزعل عليه ولكن
تتظاهر بالزعل على شان أسكت عنك ولكن ماني ساكته
لو ذبحتني .. فقال قومي سوي لي كاسة شاي .. قالت
شاهيك جاهز قم بس معي الله يهديك .. فقال ما فيه فكه
من خرابيطك ..قالت وش تقول خرابيط لو شفتها متأكده
أنك ما راح تصدق اللي تشوف عيونك .. قال الله يكتب
لنا ولك الهدايه يا بنت الناس اذكري ربك واتركي
هالموضوع .. مسكت بيده وسحبته فجاراها ومشى
معها .. وبعد جلوسه قالت أفاا يا أبو احمد امسك بلحيتك
وتسوي حالك زعلان على شان ما تقول أبشري وسمي
قال الله المستعان يا حرمه اذكري ربك وش جاك الله
يهديك .. قالت ما جاني إلا خير .. طعني .. فقال لها
اولا العمر ما يخدم لبنت شابه .. ثانيا انا ما عندي شي
هالوقت .. ثالث شي انا أسرتي كبيره وعندي عيال كثار
ولله الحمد وما راح اقدر على اللي تطلبينه .. قالت
بالنسبة للعمر الله يعطيك طولت العمر والعافيه ما احد
يضمن الحياة والموت للصغير و للكبير .. بالنسبة للفلوس
لا تشغل بالك ترى مهرها عندي ولا تهتم .. بالنسبة
للعيال رزقهم على الله ماهو عليك الله بالجميع رحيم
وتراني مسكت بلحيتك فلا تردني .. ولا أضايقك ولكن
رغبتي لك بها تخليني اصر عليك .. قال هاتي مع اني
ماني مستسيغ الموضوع .. قالت خلاص وافق واذا
شفتها وما اعجبتك ننسى الموضوع .. قال هي بنت
مين اعرف اهلها قالت ايه تعرفهم ليش ما قلت لك انها
بنت عم .. قال منهم .. قالت بنت فلان طبعا ابو احمد
يعرف ذلك الرجل الذي ذكرت اسمه فقال عنده بنات
كبار ما اخبر عنده إلا عيال .. قالت شفها وبعدين يسير
خير.. فقال وان شفتك بعدين تغارين وتمشكليني وش
اسوي فيك .. قالت ان حصل مني ادنى شي سوي فيه
اللي تبي .. قال خلاص اتركيني كم يوم افكر .. قالت
تفكر كم شهر ان شاء الله .. قال قلت لك كم يوم ..
قالت كم يوم ليه نسيت كم لي احاول فيك لي شهرين
ونصف بالضبط والخوف يستمر تفكيرك دون رد
قال عيني خير ان شاء الله ارد عليك .. قالت ماني
منتظره .. أبي ردك الليله ابي اطلع انا وأنت وابيك تعزمني
للعشا .. فتبسم لها وقال اخاف انك اذا تعشيتي تنسين
فقالت ان نسيت الله عفاك ولا عاد اكلمك .. فقال خير .
******
طلع ابو احمد ومعه ساميه وتمشوا لبعض الوقت وكانوا
في صمت شديد .. ولم يتكلم احد فقال ابو احمد شوفي
هذيك البنت ما احلاها .. وقد كانت عجوز تقطع الشارع
يادوب تمشي فضحكت وناظرت فيه .. وسكتت فقالت
المهم لا تخلينا بلا عشا .. فقال ابشري الحين نروح
نتعشى في المطعم الـ ؟؟؟؟ . وصلوا المطعم وطلعوا
وتم طلب العشا وبعد ان جاء قالت شوف عاد ترى
ما يطب بطني العشا حتى تعطيني وعد بالموافقة
أقلها تسمح لي اكلم ام البنت وأتفاهم معاها مع اني
متأكده من موافقتها واذا شفت البنيه ساعتها تقرر
انت .. قال شوفي أنا متأكد انك ما راح تصفطين
لي إلا شي أكثر من رائع .. ولكن انا حقيقة ما ودي
في مثل هذا الموضوع .. قالت المهم وش قلت قال
تعشي وبعدين يصير خير قالت ما اكل حتى تعطيني
وعد وانت اذا أعطيت وعد ما تخلف .. قال قلت لك
تعشي ويسير خير .. قالت يعني وعد .. بدأ يأكل
وكأنه ما يسمع أي كلام .. مسكت بيده وقالت خلصت
العشا وانا المعزومه .. قال وانا منعتك قالت وين الوعد
قال خلاص تعشي ولك اللي تبين قالت وعد ابو احمد
قال أأيه .. قالت يالله مشينا قال والعشا قالت موافقتك
هي عشاي .. قال اذا ما تعشيتي موافقتي ما تصير العشا
هو السبب في الموافقه..قالت يعني تشوف كذا قال أأيه ؟
تعشوا وعادوا للبيت .. وناموا وفي اليوم الثاني عندما
حضر قالت له أبشر .. قال بشرك الله بالعافيه خير ..
قالت انا رحت للحرمة ام البنت وكلمتها .. طبعا هي
ما كلمت ابو احمد بالاساس إلا وعندها موافقة من
أم البنت حيث راحت لها مرة من المرات وشافت البنت
وأعجبت بها جدا وقالت ما احد تقدم لهالغزال .وش فيهم
الرجال ما عندهم نظر من يترك هذي المزيونه .. فقالت
أم البنت الله كريم من تطلقت الى الحين ما احد تقدم لها
فقالت ساميه لو جبت لك رجال ينشد به الظهر توافقي
عليه لها .. فقالت ام البنت مين ما يوافق اذا كان الرجل
نشمي واخلاق وينوثق فيه .. فقالت ساميه عندي لك
رجال فوق الوصف وما تندمي لو زوجتيها له .. فقالت
منهو فقال المهم تطيعيني فقالت الله يكتب اللي فيه الخير
فقالت ساميه تريني اكلمك من صدق وجيت اليوم
مخصوص من اجل هذا الشي وصافطه لكل ولبنتك ..
******
فقالت ام البنت من هذا الرجل شوقتيني لمعرفته .. وبنتي ودي
ازوجها اليوم قبل بكره بس فين الصادق والثقة اللي
يستاهل .. فقالت ساميه عندي ويستاهل ولو تعرفيه
خطبتيه انتي لبنتك .. فقالت من هو فقالت ساميه ابو
احمد .. فحطت ام البنت يدها على صدرها وقالت
يا ساتر انتي من جدك .. فقالت ساميه أأيه من جدي
ليه شايفتني منجنه .. فقالت ام البنت سلامتك الله يخليك
ولكن أبو احمد فقالت ساميه وش فيه ابو احمد قالت اولا
اجنبي عنا ثانيا عنده ثنتين ثالثا عياله مالين البيت وين
يحط بنتي .. فقالت ساميه هذا اللي خلى بناتنا في بيوتنا
ما تزوجوا غريب ومن هالحكي .. وين اللي جايك
شايفتهم صافين عند بابك ..فقالت ام البنت مو ذا قصدي
ولكن ما يوافق ابوها وحرام نظلم البنت للمره الثانيه
ابو احمد كبير في السن ..فقالت ساميه يا مهبوله الظاهر
انك ما فكرتي؟؟ اولا انتي قريبتي و بنتك تعتبر بنت عم
ومستحيل اتصرف لها بشي ما يصلح وابو احمد ما
يعرف شي عن هالموضوع الى الحين .. وتريه زوجي
واعرفه زين وما راح تحصلي مثله .. فقالت ام البنت
عارفه انه زوجك ومستغربه انك تخطبي له فقالت
ساميه تعرفي اني كبيره واكبر منه واشوف حالي ماعاد
هناك شده .. وهو يستاهل وودي يتجدد وبنتك تحصل
رجل محترم ورجال نشمي وابو احمد تفوق اوصافه
كل الاوصاف اصحي .. والحين ابي ازهم على
البنيه واشاورها وانتي تسمعي بس اعطيني ريح
موافقة انتي والله يسهل الامر .. فقالت ام البنت
يا ساميه لا تورطينا مع هالرجال أخاف من المشاكل
ويكفي اللي صار لنا .. فقالت ساميه مضمون وعلى
مسئوليتي وان وافق وأخذ بنتك تريك الكسبانه .. هاااه
وش قلتي .. فقالت ام البنت خليني افكر وارد عليك ..
فقالت ساميه التفكير لو كان ماهو من طريقي انا أضمن
لك كل اللي تخافين منه انه ما يصير..فقالت توكلي على الله
سوي اللي تبينه .. فقالت توكلنا على الله .. أزهمي بنتك
واذا جلست خلينا بروحنا زين .. فقالت زين .. زهمت
ام البنت على بنتها وقالت تعالي .. جات البنت وقالت
سمي فقالت امها اجلسي هالمره تبيك .. فجلست ..
قالت ساميه تثقي فيه وتصدقي كلامي في هذه الاثناء
قامت الام .. فقالت البنت طبعا اثق فيك واصدقك الله
يحفظك .. فقالت ساميه عندي لك خطيب فقالت البنت
الله يستر علينا من الخطبان اللي يلبسون ثياب الرجاجيل
فقالت ساميه أفااا .. ليش تقولي هالكلام .. فقالت البنت
ما عاد هناك صادق ينوثق فيه..فقالت عندي رجال فوق
الوصف وعلى مسئوليتي الخاصة وأعرفه زين ..
فقالت البنت الحقيقه انا انظلمت جدا مع الرجال اللي
تزوجته والخوف يجي ألعن منه .. وأخاف يستمر الوضع من جرف في
دحديره .. فضحكت ساميه وقالت لها أنا عارفه اللي
حصل لك وعارفه ان هالشباب وهالزين ما يصلحله
إلا رجال شيمه وقيمه يقدره ويحافظ عليه .. فتبسمت
البنت وهدأ وضعها .. فقالت ساميه هاااه وش رايك
فقالت بالتأكيد اللي راح يقوله ابوي وامي هو اللي
يصير .. فقالت هذا صحيح بس موافقتك المبدئيه انتي
والباقي خليه عليه .. فقالت البنت والله اني مرعوبه من
طاري الزواج اذا ذكره احد لي بسبب اللي شفته ..
تكفين لا تحطوني في مصيبة جديده تقضي على ما بقي
لي من عقل .. فقالت ساميه عندك حق وش تقولين اذا
كنت معك وبجنبك دايم .. فقالت البنت وشلون .. فقالت
ساميه الرجال هذا هو ابو احمد زوجي .. ففتحت فهمها
البنت ووضعت يدها على رأسها .. فقالت ساميه خير
ان شاء الله ليه وهو سعلوووه خفتي منه .. فقالت البنت
ضاحكه لا بس ذا كبير ومتزوج ثنتين وعياله كثر
الدود في بيته واشوف ان ؟؟ فقاطعتها ساميه .. وافقي
يالخبله وافقي واذا ما شفتي شي خيال ما تصدقينه
ذيك الساعه حقك عليه..فقالت البنت بس الخوف الخوف
اعود في اللي كنت فيه .. فقالت ساميه هذا رجال اولا
مضمون من العلوم الشينه اللي تلمحي لها ثانيا بيتوتي
بيته وعمله ..ثالثا راعي مشاعر راقيه جدا وراعي فهم
عالي .. ورجال من روس ربعه وله مكانته بينهم وعلمه
ما ينزل الارض .. وشوفي وش سوى لي ولعيالي وانا
ماني شابه مثلك وحليوووه وألحقي شبابك تريني
شويرتك طيعيني يا حبيبتي.. فقالت البنت طيب اعطيني فرصه ..
فقالت ساميه انا كلمت امك وما عندها مانع وافقي
وخليني اشوف ابوك والله يعيني عليه ..
جت ام البنت فلما شافتها بنتها استحت وقامت ..
فقالت أمها هااه وش قالت لك .. فقالت ساميه خايفه
فقالت أمها قلت لك مرعوبه وشات عقلها .. فقالت
ساميه أزهميها وبيني لها انك موافقه .. فقالت ام
البنت هو أنا وافقت فقالت أيه توافقي هو انا غريبه عليك
وتتوقعي اني اورطك او اورط بنتك أنا ناصحه لكم ..
صوتت ساميه للبنت وقالت تعالي .. جت البنت فقالت
لها هااه وش قلتي وتري امك موافقه وهذي هي قدامك
فقالت البنت اللي تشوفه امي وابوي خير ان شاء الله .
قربت ساميه من البنت وحبتها على خدها وقالت لها
مبروك ان شاء الله يتمم لك بخير .. وحبت أمها أيضا
قامت البنت طبعا خجلانه وهذا طبع البنات .. فقالت
ساميه لأمها عاونيني الله يخليك تريني مخلصه لكم
وودي ان بنتك تكون عند هالرجال الطيب اللي ما راح
تندمي انه أخذها .. فقالت انا اسمع عنه واعرفه قد
شفته وله معروف يوم وداني ذيك المره وانتي معه
المستشفى وما انسى معروفه ولكن تعرفي الامر فيه
صعوبه وخوف .. فقالت أنا اتحمل المسئولية كامله
قدامكم كلكم اهلها وهي .. فقالت خلاص اللي تشوفيه
توكلي على الله والله يحفظنا من كل شر ..
فقالت ساميه الحين اكلم ابوها وقدامك ولو ما أموون
عليكم ما دخلت في مثل هذا الموضوع أبدا ..
بالصدفه كان ابو البنت عنده ضيف في المجلس وخرج
الضيف وجاء وطبعا ساميه تقول له خال فلم تختفي عنه
وجلس وقال الله حيها .. فقالت الله يحييك فقامت وحبت راسه
وجلست وقالت طلبتك ..
فقـــال ....
كونوا معي في الجزء القادم ...