الجزء الثامن والعشرون :
ودي أفهم حاجة واحده وبصدق الله يخليك أنتي أشغلتيني
بهذا الموضوع وما ادري ليش وانا في غنى عنه وماله
لازم وانا الان ماني صغير وحسب كلامك تقولي البنت
صغيره وشابه وهذا يجعل فارق كبير بيني وبينها ويسبب
لي في المستقبل إحراجات ما ودي إنها تحصل . فهميني
ليش مشغله نفسك واشتغلتيني بهذا الموضوع ..
فقالت ساميه أن قلت لك بصدق توافقني..فقال قولي أول
واشوف .. فقالت اوعدني انك توافق .. فقال يالغاليـــه
الموافقه لها ما بعدها الله يهديك ماهي خذني جيتك ؟؟
قالت اوعدني انك تسمع كلامي وتطيعني وان شاء الله
ما ادخلك في شي يضرك بالعكس انا ابي اللي يسعدك
ويريح بالك .. فقال الله يريح بالك ويحفظك انا عمري
ماقصرت معك .. فقالت هذا بلاي يا غالي انك تستحق
اكثر من عروس مو عروس وحده ..فقال يا ساتر يارب
قالت ساميه الله يخليك وبغلاي عندك توافق وعلى كل
حال ماهي حمل ثقيل عليك ان ما بغيتها الحل سهل ؟؟
فقال يالله خير تكلمي .. قالت موافقتك اول وبعدين اتكلم
نظر لها ولم يجب لفترة من الوقت.فمدت يداها وأمسكت
بيديه وشدت عليهما وترجته أن يوافق .. فقال لها يالله
موافق وعساه خير ان شاء الله .. فقبلته وسرها موافقته
وقالت أولا هذه الفتاة جوهره وتستاهل ان الواحد يتعب
من شاء الحصول عليها .. وثانيا أنا حبيتها لك وتراها
قريبه مني جدا وهي بنت عم كما ذكرت لك من اول
وثالثا تضحيتك معي تزوجتني وانا ام ثمانية وكبيره في
السن وما تحلم اللي في مثل سني وظروفي إنها تحصل
على رجل مثلك كريم اخلاق وطبع ووفي وانت قدمت
لي ولأولادي الكثير والكثير طيلة هالسنين .. وودي اني
اقدم لك أي شي ولو أني ما راح اقدم لك بما يوافق
معروفك وتضحيتك.الله لا يحرمني منك ويحفظك ويخليك
******
فكر ابو احمد كثيرا وقلب أموره من كل الجهات فوجد
إنها صادقه لكثرة محاولاتها وإصرارها عليه .. فقال
لها توكلي على الله وكان لديه بعض الامل ان يرفض
الاب .. فقالت الله يجبر بخاطرك ويوفقك .. أنا بكره
راح أكلم أم البنت واحدد وقت على شان تكلمها وبعدها
اخليها تخلي البنت تكلمك .. فقال بالنسبة للام ماشي
اكلمها اما البنت بعد موافقة والدها اكلمها..فقالت الشوفة
رفضت طيب كلمها تسمعون صوت بعضكم وهذا يساعد
في موافقتها وموافقة ابوها .. فقال طيب اللي تشوفيه
والله يجيب العواقب سليمه .. فقالت على خير ..
كلمت ساميه ام البنت واتفقت معها على وقت معين يكلمها
ابو احمد وأيضا طلبت منها تكلم بنتها على الموضوع
وتجعلها تكلم ابو احمد وتأخذ وتعطي معه لعل الله يوفق
لهذا الزواج .. اتصلت على ابو احمد صباحا وكان في
مكتبه كالعادة وطلبت منه الحضور الساعة العاشرة فقال
ليش عسى ما شر قالت ان شاء الله ما يجيك تعال وبس
حضر فوجد قهوته جاهزه وقالت الحين تكلم عمتك
وبنتها تراني أتفقت معها على هذا الاساس .. فقال الله
يهديك وليش ؟؟ قالت احسن .. قال انتي الظاهر راح
تجيبي لي هلوسه .. فضحكت وقالت قمر وملكة جمال
تقول هلوسه .. قال انتي عندي أحسن من كل ملكات
الجمال .. فقالت داريه وعارفه ومتأكده ولكن هذي
صبيه وشابه وانا حابتها لك وكل أمنياتي تتهنى معاها
مدت له فنجان القهوة ودقت على أم البنت .. وسلمت
عليها وقالت خذي ولدك كلميه باللي تبينه وبعدين خلي
العروسه تكلمه ويكلمها ترين بعد هذه المكالمة راح اكلم
ابوها وودي اذا وافق وسألها تكون عارفه وتوافق ماهو
نبلش بحيث إنها ما تعرف شي عن الموضوع .. فقالت
الام أنا كلمتها وفهمتها وما ردت عليه ولكن يمكن اذا
كلمته وكلمها يتغير رايها..فقالت ساميه على خير خذيه
مدت ساميه السماعه لأبو احمد وقالت انت راعــــي
ذوق ولا أوصيك .. فتبسم وأخذ السماعه وسلم على
أم البنت وحياها وردد السلام بشكل رائع وجميل وقال
لها يالله حي العمه ويارب يسلمها .. فقالت له تسلم بارك
الله فيك رايتك بيضاء ومعروف بالكرم والشهامه ولا
عليك زود فشكرها وقال لها كلمتني ساميه كلام كثير
عنكم جميعا وقالت انك ما عندك مانع انتي وبنتك وان
القبول تام وباقي الاب ؟؟ ما ادري وش رأيك بارك الله
فيك .. فقالت انت ما أحد يردك لطيبك وانا ماعندي مانع
وان شاء الله البنت توافق وهذي هي جنبي اذا تبــــي
تكلمها ماعندي مانع .. فقال الحقيقة كان ودي ما اكلمها
إلا اذا وافق والدها تعرفي إحراج ولكن ما دام إنــــها
جنبك وكلمتيها وعندها خبر هاتيها والله يسهل الامر ..
******
انتظر ابو احمد أحد يرد او يقول ألوو .. او يسمع أي
صوت فما سمع شي إلا بعض الانفاس متقطعة خفيفه
فقال السلام عليكم ومساء السعادة والبشر .. فلم ترد
بشكل مباشر وبعد ثواني قالت عليكم السلام أهلا بك
فقال وبك الهلا والسعد وان شاء الله الفأل جميل أتمناه
لك .. قالت شكرا وتسلم ..وسكتت فقال لها تري الدخول
في مثل هذا الموضوع يلزمه توافق والتوافق يلزمــــه
تفاهم ووضع النقط على الحروف .. وانا ما راح ادخل
في تفاصيله إلا بعدما أسمع موافقتك الشخصية والحقيقية
فلم ترد .. فقال براحتك وعلى أقل من مهلك فكــــري
وراجعي أفكارك ولا تقولي موافقه إلا بعد أقتناع كامل
تري الحياة ومشوارها طويل ولا يجب ان يقول الواحد
بعد وقت يا ليتني ما وافقت .. فقالت ان شاء الله وسكتت
فقال مثل ما قلت لك فكري وراح اكلمك مره ثانيه والله
يكتب ما فيه الخير .. وودعها وقال لها هاتي أمك ومع
السلامه .. فردت الام وقالت اشوف البنت ضاعت
وصغرت ومن أعطتني السماعه هجت وش قلت لها
فقال ما قلت لها إلا كل خير .. وان شاء الله إنها اذا
وافقت ما توافق إلا عن أقتناع .. فقالت على خير .
فقال ابو احمد أن شاء الله أتصل بعد كم يوم وتكون
فكرت وأقتنعت ولا أبيك كرما تضغطي عليها خليها
براحتها فقالت الام الله يريح بالك ويسعدك تسلم بارك
الله فيك .. فقال لها مع السلامة وحفظ الله .. وأعطى
السماعه لساميه وهي كانت تستمع بإبتسامة عريضه
وسعادة كبيره .. وقالت ساميه لأم البنت جاك العلم انه
موافق ووده بنسبكم .. ثم قالت ان شاء الله لي اتصال
قريب وتكون العروسه فكرت وأعطتك موافقتها عن
أقتناع .. وسكرت الخط .. فقالت شفت انا ما أضيع
وقتك واشغلك كما قلت .. فقال ابو احمد والله اني خايف
من تواليها والله يستر ..فقالت ما يجيك إلا الخير والبشر
******
بعد يومين قالت ساميه لأبواحمد أبشرك بالخير ابو احمد
فقال الله يبشرك بمثله خير ان شاء الله وش عندك قالت
الليلة تكلم خطيبتك وأمها وتسمع بأذنك وش يقولــــون
وبعدها تتركني اكلم الاب وأتفاهم معه .. طبعا ام البنت
وأبو البنت كلهم من أقرباء ساميه والقريبين حيل وتمون
عليهم على شان كذا مأمله خير .. فقال الله يجيب الخير
قالت الليله تكلمهم ومن بكره أبدأ المحاوله وان شاء الله
يصير خير .. فقال طيب وهوشايل هم مثل الجبال ولكن
لم يبين لساميه شي ..وطبعا ساميه عندها الخبر اليقين
وعندها شبه موافقة بس كان الهم ابو احمد وموافقته
كانت صعبه جدا .. وفي المغرب قالت ساميه لا تتأخر
عليه قبل الساعه عشره تكون عندي الله يحفظـــــــك
لا تفشلني تراني أخذت موعد على هذا الوقت ..
كان ابو احمد جالس في الصالة مع جميع العائلة
فقالت وين اللي قلت لك فقال سمي وش تأمرين فقالت
ليه نسيت .. فقال بدري ما راح شي فقالت تعال أبيك
فتبسم وقال طيب الحين اجيك .. دخلت وقالت وش فيك
الله يهديك نسيت وش قلت لك الناس مواعدتهم وانت ولا
على بالك .. فقال الله يهديك اشغلتي نفسك والامر بسيط
قالت الله يحفظك لا تحرق دمي .. قالت سلامتك آمري
واللي تبينه انا حاضر .. قالت ابيك تكلم ام عروسك
وعروسك .. قال طيب يالله اتصلي عليهم .. فقالت
حالا وتم الاتصال وسلمت وقالت تبين ولدك يالغاليه
سمي خذيه الله يوفق الجميع .. أخذ السماعه ابو احمد
وقال السلام عليكم ورحمة الله وبركاته .. يسعد مساكم
بكل خير فردت عليه الام بكل احترام وتقدير وقالت انا
موافقتي حاصله ولكن مالها فائدة بدون موافقة البنت ..
وموافقة ابوها أهم شي في الموضوع وعاد انت وساميه
هذا شغلكم .. قال لها الله يجيب الخير والسلامة .. قالت
خذا البنت وتكلم معها وان شاء الله توافق وهي مرتاحه
وانا ما ازيد على الخير إلا خير .. فقال ابشري وسمي
أعطت السماعة لبنتها .. وقالت الوو بصوت يا دوب
يسمع .. فقال الله يمسيك بالخير والغلا يالغلا .. فقالت
هلا ومرحبا وسكتت فقال ابواحمد هاااه وش صار تري
موافقتك أهم شي في الموضوع .. فقالت ليش ؟؟ فقال لها
طبعا انتي اللي راح تعيشي الحياة الزوجية والمشاركه
ولا يجب ان تكوني إلا براحتك وموافقتك عن تفكير
ووضوح .. وأبي اقول لك أمر لازم تفهميه وتعرفيه
بشكل صحيح وواضح .. فقالت تفضل قول اللي عندك
فقال لها طبعا تعرفي ان عندي ثنتين نسوان ومطلق
وعندي اولاد وتجربة ليست بالقليلة وانك راح تكوني
الثالثة وراح يكون تواجدك وحياتك مع اسرتي الاولى
ماهو مع ساميه وانك راح تكوني معي وين ما راحت
ولا تحديد أي مكان أو أي مدينة المهم معي وين ما
رحت دون أعتراض او مشاكل وهذا الامر عليك
معرفته من الان قبل أي شي .. فقالت وش بعد ..
قال سلامتك .. الاهم ان حياتك ان شاء الله تكون في
اجمل واروع ما يكون لا تهتمي بكثرة الاولاد او كثرت
من في بيتي واكثر من زوجه تأكدي اني ما راح اخدعك
او اقصر معك ان شاء الله ويمكن تسمعي عني ما يسرك
.. قالت ما أسمعه عنك جميل ورائع وان شاء
الله تكون أفضل واجمل مما سمعت .. فقال ابو احمــد
يعني موافقة تتزوجيني .. سكتت ولم ترد على الفـــور
فكرر السكوت ما ينفع .. موافقه تتزوجيني وعندك علم
بكل ظروفي وشكل حياتي .. قالت ان شاء الله .. كرر
ابو احمد اسمعي يا بنت الناس الدخول في أي شــــي
أسهل من الخروج منه هل فكرتي وأستخرتي .. قالت
أيوه .. قال أبي أسمع موافقه صريحه وواضحة وكامله
قالت ان شاء الله .. قال أبي أسمع موافقتك على كل ما
قلت .. فكأن ابو احمد سمع ضحكه خافته جدا يا دوب
تسمع وسمع صوت أمها تقول لها ردي زين وش فيك
هذا رجال ما راح يجيك احسن منه خلي الدلع .. كرر
ابواحمد وش قلتي ؟؟ قالت خلاص يا ابو احمد .. وسكتت
قال وش خلاص يعني ؟؟ قالت موافقه والله يتمم بخيـــر
قال انتي فهمتي وش قلت لك بالضبط .. قالت نعم فهمت
والله يوفق .. فقال فكري وأستخيري وراح اسمع صوتك
مره ثانيه اذا ما كان عندك مانع ..قالت طيب .. فقال لها
بكره مثل هالوقت ان شاء الله اسمع صوتك وموافقتك
بشكل اوضح وأوكد .. قالت طيب .. وكان كلامها قليل
ومختصر ودعها وقال هاتي الوالده .. ردت عليه وقالت
له خلاص يا أبو احمد البنت موافقه بس تعرف البنات
يخجلن .. فقال ابواحمد لازم اسمع موافقتها بشكل يريحني
حتى اتكلم وقلبي جامد ما أخاف من تواليها وانتي عاقله
بارك الله فيك وتفهمي مثل هذه الامور..فقالت على خير
******
بعد إنتها المكالمه قالت ساميه خلاص ابو احمد البنـــت
موافقه وش باقي الله يهديك .. قال لها الموافقة المهزوزه
تعتبر ناقصة وينخاف منها .. خليها تفكر وتوافق
براحتها ورغبتها بدون ضغط عليها او تشويش .. قالت
ساميه اقدر اقول مبروك يا أحلى وأجمل عريس .. فقال
لها بحضورك وانتي بأتم الصحة والعافية يا الغاليه ..
قالت خلاص بكره في الليل راح نسمع موافقتها الاكيده
فقال لها بشرط ما تتصلي انتي عليهم وخليني انا اتصل
ومن هنا وانتي موجوده .. قالت ليه خايف اغصبها ..
فضحك ابو احمد وقال لا ما قصدت كذا ولكن اتركيهم
يفكروا براحتهم وبالاخص البنت .. فقالت ابشر ولك
وعد ما اكلمهم ابدا إلا بعلمك .. وفي اليوم الثاني
وفي نفس الموعد تقريبا دقت ساميه وابو احمـــد
موجود وأعطته السماعه ولم تكلم هي وانتظر
أحد يرد عليه فرفعت السماعه من الطرف الاخر
ولكن ....
كونوا معي في الجزء القادم ...