[سهم المحبه]

الجزء التاسع والعشرون :

لم يرد أحد فمد السماعه بسرعه لساميه وقال تكلمي
فقالت الوو .. فرد عليها أبو البنت وقال نعم .. فقالت
مساء الخير ابو فلان فقال لها مساء النور من انتي
فقالت انا ساميه فقال هلا وحياك وش لونك عساك
بخير .. وش عندك تبين شي .. فقالت سلامتك اسلم
فقط ليه ممنوعه ما اتصل عليكم .. فقال لا ما قصدت
ولكن استغربت مبطيه ما اتصلتي ؟؟ فقالت إلا اتصل
ولكن احيانا ما تكون انت اللي يرد .. فقال حياك الله
وتسلمي بارك الله فيك .. وأنهت المكالمه على أنها سلام
فقط ولا شي غيره .. وبعد نصف ساعه تقريبا جــــاء
اتصال من أم البنت وتعتذر وتقول كان ابونا هنا وما
حبينا يأخذ خبر عن شي..فقالت ساميه زين ان ابو احمد
ما تكلم كان هو اللي ماسك السماعه .. المهم اخباركم
فقالت ام البنت بخير والحمد لله والعلوم زينه .. وهذي
عروسكم جالسه بجنبي .. قالت هاتيها يكلمها ابو احمد
مصر يسمع موافقتها بكل ووضوح فقالت ام البنت أحسن
خليها اذا وافقت توافق براحتها ورغبتها .. مدت ساميه
السماعه لأبو احمد وقالت عروسك معك على الخـــــــط
تبسم وقال الله يجيب العواقب سليمه وعلى خير ..
أخذ السماعه وقال مساء الخير..فردت عليه البنت وكان
أسمها سميه .. وقالت هلا ومرحبا .. فقال لها هاااه
وش صار معك .. قالت انا قلت لك موافقه من أول
قال موافقه بعد تفكير وأقتناع ورضى .. قالت نعم .
قال تعرفي وش مقبله عليه هذا زواج وارتباط وحياه
ومسئوليه ماهو كلام يقال .. قالت فكرت أكثر من مره
وانا اسمع عنك كل خير وان شاء الله أنك تكون احسن
من اللي سمتعه عنك .. فقال لها انتي وش اسمك قالت
تخطب وحده وما تعرف اسمها .. قال لها احب اسمعه
منك .. قالت اسمي وسكتت بعض الشي ثم قالت ..
{سميه}
فقال ابو احمد عاشت الاسامي والسمو من صفات اسمك
الله يحفظك فقالت شكرا تسلم .. همس لها سميه فقالت
نعم قال لها لو سمحتي الله يخليك ويحظفك فكرتي بشكل
واضح ووافقتي برغبتك وبراحتك .. فقالت نعم فكرت
واخترت وان شاء الله اختيار طيب .. طابت اوقاتك
"" بدأت الرقة والود تنشئ أزهارها في رويضات القلب""
لدى سميه وهذا ما كان يريده ابو احمد أن يجد قبولا
طيبا ومريحا .. فقال لها وأوقاتك وحياتك أسعد واجمل
فشكرته وقالت الاهم ان يكون هناك تفاهم صحيح وصادق
فقال لها هذا الشي اللي احب ان يكون بارك الله فيك
ودعها وقال هاتي الوالده .. فقالت أبشر ومع السلامه ..
"" أبشر ومع السلامه ""
أحس بها أبو احمد تخترق شغاف
القلب وعلم أن تلك الفتاة التي لم يراها ولا يعلم ماهو
شكلها ولونها بدأت تقترب منه ويقترب منها ومشاعره
بدأت تزيد نشوتها اكثر واكثر مع الوقت .. ولكن كان
منتبه لمشاعر ساميه فهي أنثى والنساء كيدهن عظيم
وقلوبهن كلمة تثيرها بركانا كبير وكلمه تخمد ذلك
البركان .. اقفل الخط وقال هاااه مبسوطه ورطيني
وخليني في بحر ماله شواطئ .. قالت ما أورطك ولكن
قول أسعدك بكل ما أقدر عليه .. فقال الله كريم وتسلمي
وعساك على القوه ان شاء الله.فقالت له هاااه وش الحين
أكلم ابو البنت ونتوكل على الله .. فقال لها ذي رغبتك
وإلا أنا ماني ملزم .. فقالت هاااه واللي شفته .. فقال
وش شفتي قالت السحر بدأ يتحرك وينسج خيوطه وفتنته
فقال من الحين ...فضحكت وقالت أمزح معك وش قلنا .. خلها
تصير السالفه ويوافقوا كلهم وبعدين ما تشــــــــــوف
إلا الخير والبشر ان شاء الله انا ما يجيك مني ان شاء
الله ما يزعجك أبدا فقال لها وعد .. قالت ان شاء الله
ياعمري الله يوفقكم ..فقال والله اني خايف تصير بلاوي
مالها أخر .. قالت لا تهتم ولا تخاف ..
******
مرت أيام بل شهر كامل ولم تلكمه ساميه بشي عـــــــن
الموضوع وكان وده يعرف وش صار .. ومر على
الشهر اسبوعين ولم تكلمه .. وكان وده يسألها .. ولكن
خاف ان يصير عندها ردة فعل فلم يكلمها وسكت
وبعد مروراسبوع أخر على الاسبوعين .. وعندما
جاء وبعد تقديم العشاء له وجلوسه واستعداده للنوم
قالت له عندي لك سلام .. فقال الله يسلمك ممن فقالت
من انسان يعزك .. فقال الله يعز الجميع .. من هو هذا
اللي يعزني أعزك الله .. فقالت من وحده اسمها سميه
فقال الله يسلمك ويسلمها..وسكت .. فقالت ما ودك تسمع
صوتها .. فقال الله يستر على بنت الناس وش جاب سيرتها
الحين .. فقالت جيتهم اليوم وسلمت عليها وانا خارجه وقلت
لها ما ودك تقولي شي لخطيبك فتبسمت وقالت
سلمي عليه ودخلت وهي تبتسم .. فسكت ابو احمـــــد
أيضا ما وده ان يسأل وبدأت أعصابه تسخن بعض
الشي .. فقالت له اشوفك ما ودك تعرف شي عن
الموضوع .. فقال الكلام عندك وانا ما عندي شي تكلمي
اذا فيه شي يحتاج الكلام .. فقالت كلمت ابوها ولم يرد
عليه وفضلت اكررعليه واجي واروح يمهم طيلة الفترة
اللي راحت وما تركت شي ما قلته وأحاول معه
وكلما قلت له هاااه وش قلت قال اشوف وارد عليك
ولكن ما كان يرد عليه .. واليوم قال تكفيه واحده منا
وهي انتي والرجل أعرف عنه انه كريم خلق وطيب
ولكن صعب اعطيه بنتي فهو من غير قبيلتنا وأخاف
يصير شي ما تحمد عقباه..فقلت له على ضمانتي وتحت
مسئوليتي .. فقال وان جتني بنتي بعدين مضروبه أو
زعلانه وش اسوي فيك انتي وإياه .. فقلت سوي اللي
تريده ساعتها وتراه من أحسن الرجال خلق وطيبه
معروف شوف وش سوى معي انا وأولادي فقال ذاك
شي أخر انتي وإياه متفاهمين .. فقلت راح يفهم بنتك
ويكرمها وش تبي اكثر من كرامتها وكرامتك .. فقال
ما أبي إلا راحة بنتي .. فقلت راحتها حاضره بس وافق
فقال اشوف وارد عليك .. فقلت ماني قايمه إلا بكلمه
منك فقال خلاص قلت لك ارد عليك فيما بعد .. فقمت
وقبلت رأسه وقلت له تكفى رد عليه الحين وخلني اروح
مجبورة خاطر صار لي وقت وانا اجي واروح وانت ما
ترد عليه .. فقال اسمعي انتي عزيزه علينا وانتي منا وفينا
وطلبك ما يرد ولكن الرجل غريب عنا واخاف على بنتي
يكفيها ما جرى لها .. فقالت قل تم وخل الباقي عليه وانا
المسئوله عن كل شي تراها ما راح تحصل أحسن منه طعني
قال الله يجيب الخير ..خلاص روحي وبكره ان شاء الله
فقلت ماني رايحه الليله إلا وأخذ منك كلمه . فقال اطيعك ولكن
تريني ما ارحمك انتي ولا هو اذا صار شي
ما يعجبني .. تسمعي .. قلت ابشر وعلى أمرك .. فقال
خلاص خليه يجيني والله يسهل الامر ولكن ترين ما فيه
عرس ولا حفله تعرفي ان أخوي متوفي له مدة قصيره
وما نبي صجه ولجه ..قلت ابشر..وهذا من حسن حظك
يا ابو احمد تأخذ عروسك وتروح وتسلم الخســـــــــاره
سكت ابو احمد ولكن شعوره في حالة ثوران ولكن ما
وده يبين شي .. فقالت هاااه وش رايك في اللي سمعته
فقال الله يجيب الخير ويسهل الامر .. وسكت أيضا ..
فقالت الظاهر انك تبي هوشه .. فقال ليه .. فقالت شوفوا
يا ناس انا وش اقول وهو في حالة برود شديده .. قال
وش تبيني اسوي الموضوع موضوعك وانتي اللي بدأتيه
وشوفي كيف تنهيه .. فقالت..خير بكره نروح له ونحدد
الوقت ونتفق .. فقال ابو احمد بهذي البساطه .. فقالت
أيه أجل كيف السالفه .. فقال طيب وان طلب مطاليب
وش اقول وانتي عارف البير وغطاه مثل ما يقولون ..
فقالت ما لك إلا السعد وابشر بالسعد.. بكره ابي اروح
انا وانت مشوار قبل ما نروح له وابشر بكل خير يا عمري
ما يحدك شي وانا قريبه منك وابشر بعزك .. فقال الله
يسلمك وتسلمي يا بنت الرجال..فقالت والحين .. ماودك
تسمع صوتها .. فقال والدنيا تدور به وقلبه يرجف ..
الحين راح الليل ويمكن الرجل في بيته عيب علينا نتصل
بهذه الساعه .. فقالت تبي الصدق قلت لأمها اني راح
أقول لك تتصل .. فقال بكره نتصل أو اتصل انا من
العمل .. فقالت آآيه على شان ما اسمع وش تقول فقال
لها شفتي اني راح أبدأ في مشاكل قبل ما يصير شي
فقالت امزح عليك هذي خطيبتك وراح تكون زوجتك
ان شاء الله قريب وقريب جدا وبراحتك أنا أمزح عليك
وادري انك راح تقول هالقول وضحكت ساميه وهي في
حاله من الفرح والسعاده .. قامت وجابت الهاتف
واتصلت وردت ام البنت وسلمت عليها وقالت أبي اعطيك
ابو احمد كلميه وباركي له وخلي سميه تكلمه وتأخذ
عليه ويأخذ عليها وبكره راح نجيكم انا وإياه ان شاء
الله .. ومدت سماعة الهاتف له وقالت كلم عمتك ..
وراح تكلمك سميه وخلك فهيم وتراك ساحر القلوب
أعرفك ولكن أحب اقول لك ان الكلمة الحلووه لها
مفعول كبير وانت تعرف وش تقول .. وضحكت وقالت
ابي اروح عندي شغل ابي اسوي لك عصير أخاف يحر
قلبك على شان تبرد عليه .. طبعا كان ضاغط علـــــى
السماعه براحة يده لئلا أحد يسمع الكلام..وبعدما راحت
تكلم وسلم .. فقالت العمه هلا الله يمسيك بالخير والف
مبروك أبشرك عمك وافق وان شاء الله الله يتمم لكم
بخير .. فقال تسلمي يا عمتي الغاليه وبشرك الله بالخير
وان شاء الله ما تشوفي إلا الخير .. قالت تسلم وهذي
خطيبتك معك كلمها وتفاهموا وان شاء الله يقرب البعيد
شكرها وتمنى للجميع الفرح والسعاده .. انتظر يسمع
صوت قادم من بعيد هو بدأ يشتاق لسماعه ويتحرى
يسمعه .. واذا بذاك الهامس يقول مساء الخير بصوت
رقيق وناعم كأنه يطل من سماء الثقة فرحا سعيدا يملآ
قلبه الآمل بصبح جديد تطيب فيه الحياة .. فقال مساء
السعادة والبشر والآمل أهلا بك سميه .. فقالت كيف حالك
فقال بخير كيف حالك انتي .. فقالت بخير والحمد لله
فقال هاااه وش صار عندكم من أخبار فقالت ولا شي
فقال لها تري الاخبار مبدأها من عندكم لا تبخلي عليه
بها .. فقالت كانت عندنا ساميه اليوم وقالت إنها بكره
فسكتت ولم تكمل فقال كملي يالغلا لا تستحي ودي
اسمع منك اللي صار .. قالت تقول ساميه انها راح
تجي وانت راح تجي بعد .. فقال ابو احمد وبس ..
قالت ابوي وافق وقالت انكم راح تجون بكره .. فقال
لها وانتي وش رايك نجي .. فقالت الله يحييكم ..
وكان ابو احمد يحاول ان يكون لديها الجرأة وتتكلم
دون تكلف .. كرر قوله جيتنا من شأنك ولازم أعرف
رأيك ودك نجي وإلا لا .. فقالت الله يحييكم وأهلا بكم
فقال ابو احمد تسلمي الله يبارك فيك .. ان شاء الله بكره
نجي بعد العصر او بعد المغرب.ولكن بكره راح اكلمك
في الصباح فيه امور ودي اسمعها منك وأفهم
رأيك فيها فلم ترد .. فقال هاااه اكلمك وإلا مالك رغبه
فقالت لا كلم براحتك ما في شي يمنع .. فقال طيب في
حفظ الله وأحلى مساء جميل يداعب مشاعرك وافكارك
حتى بكره ان شاء الله وانتي طيبه .. فقالت تسلم بارك
الله فيك واشكرك على مشاعرك الحلوووه .. فقال لها
من جد فقال بعفووه كبيره جدا .. أي والله .. وكان
هذا الرد ينبئ بمشاعر كالبحر الهائج لدى هذه المسكينة
التي ظلمت كثيرا كما ذكرت ساميه عنها ..
أقفل الخط ابو احمد وساميه بجانبه وكانت تتشاغل حتى
لا ينزعج ابو احمد ويأخذ راحته في الكلام فقد كانت تحبه
كثيرا وتتمنى له السعاده بأي شكل .. فقال لها يسعد
مساك يالغلا .. فقالت أنا وإلا هيه .. فقام ابو احمد
وأراد الخروج فقالت بغلاي عندك لا تخرج وأرجع
فرجع وقالت والله العظيم اني أمزح عليك وأعرف انك
أي حركه أو كلمه اقولها لك بهذا الشكل تثير جنونك
وتغضب .. امزح يا حياتي تراك غالي وتراها غاليه
ولا ودي لكم إلا الخير وان شاء الله تشوف على قدومها
الخير والسعاده .. فشكرها ابو احمد وقال تسلمي هذا
العشم والامل .. قضى ابو احمد ليله ساهد ولم يكن
مرتاح وتعسر عليه النوم بعض الشي ولكن نام في
النهاية .. وفي الصباح بعد ان أفطر وأراد الخروج
الى عمله .. قالت له خذني معك حياتي ابي اروح
بشغله .. فقال لها يالله ما يخالف وين تبين تروحين
فقالت راح تشوف بنفسك .. توصلني وتروح عملك
وقبل الظهر ترجع لي وتراني عازمتك على الغداء
في مكان يعجبك .. فتبسم وقال خير ان شاء الله .
******
كان هناك طرف أخر لم يذوق طعم النوم أغلب
الليلة الماضية ومع ذلك أفاق في وقت مبكر من
ذلك الصباح الذي يعتبر جميلا ومباركا ان شاء الله
.. سميه كان هذا وضعها .. وبكرت في القومه تنتظر
الاتصال الموعوده به .. وكلها شوق لذلك الاتصال
وانتظرت .. وأنتظرت .. وأنتظرت .. ولكن ..

كونوا معي في الجزء القادم ...