الجزء اللاثـــــــــــــون :
تأخر الهاتف عن الرنين وكانت أمها تلاحظها ولكن
دون أن تقول شي .. وفي تمام الحادية عشر رن الهاتف
بعد صمت طويل كان يعادل ايام وشهور..ففزعت سميه
وركضت لترد على الهاتف .. وقالت ألوووو بعجلة
وشغف وكررت قولت الووو مره ثانيه ولم تنتظر احد يرد
وكان المتصل أبو احمد وقال السلام عليكم.صباح الخير
فقالت بتلعثم واضح هلا عليكم السلام .. هلا ومرحبا
فقال كيفكم وان شاء الله صباح حلووو وجميل فقال
أييه حلوو كيفك انت .. طبعا كانت متلعثمه ومضطربه
بعض الشي .. فقال ابو احمد حتى يجعلها ترتاح بعض
الشي ويشغل فكرها بشي يزيل الاضطراب والتلعثم
ويتكلم هو شويه حتى ترتاح وتستطيع الرد بأعصاب
هاديئه ومرتاحه .. شوفي سميه فقالت سم .. فقال انا
صحيح ما شفتك وما شفتيني وما كنت أعرف عنك
شي ولكن النصيب كما يقولون يصيب .. وانا راح
اجي الليله وأخطبك رسمي وان شاء الله ربنا يتمم
بخير ولكن أعود وأطلب منك موافقه صريحه وصحيحه
وتكوني على ثقة من افكارك وموافقتك حتى اكون أنا
مرتاح واتقدم لك بكل ثقه ..وجاوبي براحه تريني اكلمك
من المكتب .. فقالت شوف ابو احمد انا فكرت في أشياء
كثيره خلال الفتره الماضية وكنت اسمع من امي ومن ساميه
كلام عنك اذا كان صحيح فأنت من أحسن الرجـــال
كرامه وشرف ورجوله .. واشغلني تفكيري حتى ان
لي اسبوع ما انام الليل مره اقول ما ناقصني شي ان
شاء الله مع هذا الرجل ومره تجيني افكار تقول غير
كذا ولكن بعدما طمنتني امي وساميه الله يجزاهم خير
عن اخلاقك وطيبة قلبك قررت ان تكون موافقتي صادقة
وتستاهل ان اقول لك هلا بيك ومرحبا عزيز وغالي
وتشرف دارنا مرحبا بك ويسعدني شوفتك تشرفنا
فقال تسلمي ويسلم رأسك وبالمهلي هلا ..
قالت الله يسلمك ..فقال لها احتمال الليله ان اعطي الوالد
الموافقة وتمت راح اشوفك وتشوفيني .. وش رايك
فسكتت شويه ثم قالت الله يحييك وتشرف وراح ينور
البيت لحضورك وتشريفك .. فقال شكرا ..
وقال ما ادري وش راح يكون الاتفاق مع الوالد يقول
حسب ما قالت ساميه مافيه فرح ولا حفله ولا شي
يعني سكيتي .. فقالت اللي يقوله الوالد هو اللي يصير
المهم أخذ ابو احمد وخطيبته التي أتت بعجلة وبدون
مقدمات وقد كان رافض الفكره شكلا ومضمون ولكن
سبحان الله النصيب كيف اذا قدره الله يصبح حقيقه
أخذوا مع بعضهما وقت ليس بالقصير في الكلام حول
تلك الليلة وما سيحصل فيها وما زال التأكيد لم يحصل
فقط وعود والله ييسر كل أمر .. في نهاية المطاف
ودعها على أمل الحضور في المساء الى منزل والدها
وما زال ذلك المصير مجهولا .. نزل السماعه فاذا
الهاتف يرن .. فرفع السماعه فاذا هي ساميه ..
الله المستعان ساميه وسميه يا لعجيب الصدف
والله يعينك ابو احمد .. فقال هلا فقالت دقيت عليك
ثلاث مرات والتحويله مشغوله فقال كنت اكلم سميه
فقالت ما يخالف خذ راحتك ولا اعتراض بس خلصت
من بدري وكنت ودي تجي .. فقال الحين صلاه بعد
الصلاة مباشره اكون عندك .. فقالت تسلم ..
******
بعد الصلاة وصل وجات ساميه .. وسلمت عليه ..
وقالت اسمع يا ابو احمد عساني ما اذوق يومك
لا تزعل مني اذا مزحت معك سميه ان شاء الله تكون
حلالك خذ راحتك ولا تزعل من مزحي ارجوك لا تزعل
فقال تسلمي والله لا يجيب الزعل .. فقالت نروح عمري
نتغدى انا وانت في المكان اللي رحناه ذيك المره
فقال ابشري ولا يهمك فقالت بس انا اللي عازمتك
والمناسبة روحتنا الليله لأهل سميه .. فقال الله يكثر خيرك
وتسلمي .. وان شاء الله ربنا يتمم بخير .. مشوا وراحوا
لمطعم راحوا له اكثر من مره .. وطلب الغداء ابو احمد
وحاسب .. ولكن قالت ساميه ما اكل فقال لها ليش قالت
انا اللي عازمتك وتحاسب انت فقال مني ومنك واحد ما
فيه مشكله .. فقالت كذا تشوف فقال طبعا فيه خلاف
بيني وبينك .. فقالت متأكد أن ما فيه فرق بيني وبينك
فقال بالطبع .. فقالت خذ هذا الظرف ولا أسمعك تقول
شي .. فقال وش فيه .. فقالت مهر عروسك وكل اللي
يلزمك .. فضحك تبسم وقال تسلمي خيرك سابق وماني
شاك في شي .. ولكن لي طلب .. فقال تأمر أمر فقال
اذا ما سمعتي كلامي تخرب الخطبه ويخرب العرس
فقالت أفاا ؟؟ ليش فقال كل شي إلا عروسي ما اقبل
ان يكون مهرها من غيري .. فقالت ما قلت انه مافيه
فرق بيني وبينك .. فقال إلا في هذا الامر .. فقالت
أجل كيف .. فقال أقبل منك هذا المبلغ ولكن على شكل
سلف اسدده فيما بعد براحتي وتسلمي وكما قلت لك
خيرك سابق وما ادري كيف اقدر ارد لك الجميل
فقالت طيب ما فيه مشكله اللي تشوفه يصير .
بس أهم شي تكون في راحه وسعاده وثقه وانت تكلم
والد سميه .. فقال شكرا لك وتسلمي والله لا يحرمني
منك ويمتعك بالصحة والعافيه ..
تغدوا وراحوا للبيت وارتاحوا ومشوا متجهين الى بيت
والد سميه وقد اتصل ابو احمد وكان قصده ان رد عليه
ابو سميه قال أستأذن منه في الحضور إليه .. وان ردت
عليه سميه فهذا المطلوب يبي يشوف وش الحال وش
عندها وهو يعلم أنها اصبحت مشغولة الفكر والقلب
مصاب بشبه أضطراب فالموضوع ليس بالسهل والكل
يعلم هذا الشي..المهم رن الهاتف ورفعت السماعه وسمع
رد جميل في رايه وحلوو ويسعد .. الوو .. فقال
سلام أحلى من الطيب واجمل من المسك والعنبر
وأحلى من جنائن كل الورود والازهار .. فقالت
يا هلا ويا مرحبا .. يفرح القلب بقدومك ابو احمد
ولكن انتظر حتى تواجه الوالد ويوافق ويتم كل شي
ترى ما عاد أتحمل واخاف منه يقلب ويرفض
ابوي أعرفه شديد شدة قويه جدا والله اني خايفة
منه .. فقال ابو احمد عيني خير وتوكلي على الله
وهو سبحانه الميسر والموفق .. حنا في الطريق
يمكم وان شاء الله ربنا ما يكسر بخواطرنا جميعا ..
فقالت يا هلا ومرحبا .. اقفل الخط ابو احمد وقد سمعت
ساميه صوت ابو احمد وهو يكلم .. فقالت له ان شاء الله
اشوفك وانت ماخذها وفي طريقك في إجازه فرح ومسرور
وهي معك زوجة لك حلالك .. فشكرها ابو احمد وقال
تسلمي الله يكتب لك الاجر ويستر علينا جميعا ويوفقنا..
مشوا ووصلوا بيت ابو سميه وقد كان في ذلك الوقت
نايم فدخل ابو احمد المجلس وانتظر حتى قام صاحب
البيت وتغدى وحضر الى المجلس مرحبا بالضيف
وقدم القهوة وقال يالله حي ابو احمد .. فقال ابواحمد
الله يسلمك ويبارك فيك .. الحقيقه ان الكلام لازم يكون
بين الرجال في مثل ما جئت من أجله .. لذلك يسرني
اتقدم لخطبة أبنتك سميه وسرنا موافقتك قبل حضوري
وعساك دايم الطيب بارك الله فيك.. فقال حياك الله وأهلا
بك والله يتمم لكم بخير .. فقال سم يا عمي طلباتك
لبنتك وان شاء الله نقدر نوفي بما تريد فقال المال ينتهي
يا الطيب ولا يبقى إلا طيب الرجال لبعضها واللي
أعرفه انك رجل مجرب ونسمع عنك شيمتك وطيبك
ومعروف بكل العلوم الطيبة .. شوف انت وش تقدم
وان شاء الله انك ما تقصر وبالمناسبة ما عندنا حفله
ولا عرس ولا شي .. اذا تمت الملكة تأخذها والله
يستر عليكم لا أشوفكم إلا مسيرين .. فقال ابواحمد
تسلم يا عم بارك الله فيك .. مهر بنتك كذا وكذا
وان شاء الله انه يفي بما في نفسك .. فقال تسلم
كفيت ووفيت والله يخلف عليك ويكتب لكم السعادة
فقال ابو احمد متى تشوف تراني جاهز الحين وكل
حين وربنا يوفق الجميع .. فقال لو تبي الحين ما عندي
مانع .. فقال ابو احمد أما اليوم ما يمدي راح الوقت
ولكن بكره بعد صلاة العصر ان شاء الله نجيك والمأذون
معنا .. فقال العم على خير .. ايضا طلب ابو احمد ان
يشوف العروس وتشوفه حتى لا يكون هناك ما يعكر
جوا عقد الزواج في اليوم التالي فقال ابشر الشوفـــــه
مشروعه ولا فيه مانع ..اسمح لي دقائق وابشر ماطلبت
إلا حق .. قام ابو سميه وذهب الى داخل البيت وبعد
حوالي عشر دقائق خرج اليه وقال تفضل يا ابو احمد
البيت بيتك وحياك الله .. دخل ابو احمد الى داخل البيت
وجلس هو وعمه وقد كانت ام العروس بالمجلس
فرحبت به وقالت الله يحييك ومرحبا .. سلم عليها ابو
احمد وجلس وقد كانت ساميه ايضا موجوده في ذلك المكان
وهي مره تضحك تبسم ومره يظلم وجهها وجوها
غير مستقر .. وكان خوفها من ابو البنت شديد جدا .. ولكنها في كل الاحوال وبالتأكييد سعيده
لما يسعد ابواحمد وهي أرادت ذلك الشي ..
بعد جلوس ابو احمد واذا بجميلة فاتنه تختال في مشيتها
دون تكلف كبير ضافية اللباس وعلى رأسها مسفع اسود
مطرز وجميل دخلت فجعلت تيار من الكهرباء يهز احد
الجالسين في ذلك المجلس بقوة فقالت السلام عليكم ..
فقام ابو احمد وقامت ساميه وقامت ام العروس لقومت
ابو احمد فقال ابو احمد عليكم السلام أهلا بك ومرحبا
بعروس أسعدت من أطلت عليهم .. فحاولت ترد ولكن
ذلك الموقف صعب جدا عليها وامام امها وابيها وتلك
القريبة اللي هي ساميه جعلها لا تعرف ماذا تقول رغم
محاولتها ولكنها قالت بعد تردد بسيط وتلعثم الله يسلمك
وجلست بجوار والدتها .. فقال ابو احمد الحمد لله الذي
أنعم علينا وعليكم أهل هذا البيت بالصحة والعافية
وأسأله تعالى ان يديمها على الجميع .. فقال العم تسلم
يا ولدي بارك الله فيك .. هذا عروسك واسمها سميه
والله يبارك لكم ويبارك عليكم ويجميع بينكم على خير
فقال انا جاهز يا عم بكره بعد العصر ان شاء الله
نكون هنا ومعنا المأذون والله يوفقنا جميعا ..
فقال العم أهلا بك متى ما جيت .. فقال ابو احمد
ياعم هذا زواج ونسب واجمل ما فيه التألف والتوافق
وودي اعرف اذا لك شروط لبنتك وقد شرحت لك من
اول ان ما عندي إلا بيت واحد ولكن لها مكان فيه واسع
ولا عندي بيت مستقل لها فيما بعد .. واذا في شي ودي
اعرفه من الان .. فقال ماعندي أي شروط واللي مثلك
يعرف كيف يتجمل من نسابته وما تقصر ان شاء الله
فقال لأم العروس لك شروط يا عمه او طلبات فقالت
سلامتك والله يوفقكم .. فقال للعروس وهي تكاد تختفي
في الارض لخجلها مما تسمع ومن الموقف هل لك
شروط او طلبات فأنتي في حرية الان وكل شي سمعتيه
وكيفية حياتك ان شاء الله في المستقبل .. فقالت لا ما
عندي شي .. فقال لا تستحي ولك حرية الان قولي .. اللي
في خاطرك الان يكون له ما بعده .. فقالت سلامتك ..
وطلبت الاذن بالانصراف .. فقال ابو احمد في حفظ الله
وألتفت لعمه وقال بكره بعد العصر الموعد لكتابة العقد
ان شاء الله وإلا تشوف شي أخر .. فقال العم ان شاء الله
فقال ابو احمد صداق بنتك جاهز تحب تستلمه الان وإلا
بكره .. فقال بكره وانت طيب ما من عجله عليه ..
خرج ابو احمد وزوجته ساميه .. وقد كان يتوقع يسمع
منها شيئا ما .. ولكن قالت له بعد خروجهم وركوب
السياره الف مبارك عليك يا ابو احمد وان شاء الله
تشوف على قدومها الخير والبركة والله يوفقكم ..
فقال في حياتك ووجودك يا حياتي بارك الله فيك وتري
انتي الاوله وراعيت الاوله ولن أنسى هذا الجميل وهذا
الشرف أنك خطبتي لي ودفعتي من حر مالك والله يكتب
لك الاجر .. فقالت كل اللي سويت ما يساوي ساعه من
وقتك اللي أمضيته تسعى وتجهد نفسك لأسعادي انا
واولادي الله يكتب لك الاجر تعبت كثير واللي سويته
ما ساوي شي من جهدك .. فقال تسلمي وتستاهلي كل
خير ..ولكن يا عمري فقالت آمر يا عمري انت يا حياتي ..
رغبتي في زواجك ليس إلا من أجل أسعادك وإلا تبقى
الكل فالكل والبيت بيتك وحنا أهلك .. فقال شكرا لك
وتسلمي ..بغيت اقول ان المبلغ اللي دفعتيه لي يكون
دين عليه ولا أقبل أبدا ان يكون منك كون هذا زواج
ولا يعرف الانسان وش يصير فيما بعد الله يعلم بكل
شي .. فقالت على راحتك انا ما دفعته لك إلا ورغبتي
ان يكون من عندي واذا ما يناسبك اللي تشوفه يصير
فقال مثل ما قلت لك .. قالت اللي تحب هو اللي يصير..
اتصل ابو احمد على أحد اخوانه وقال له ابي اقابلك
عند الباب وتراني مستعجل فقال له أهلا بك
وصل ابواحمد وطلب من أخيه أن ....
كونوا معي في الجزء القادم ...