[مسفرجمعان الصفا]

الدره اللي في روايع حسنها المعلوق هام
قلبي تعلّق في هواها الله لا يخيّب رجاه
من قبل انا ما اشوفها في حبها ميّت غرام
هي فرحة ايامي ولذّة قلبي وْ غاية مناه
هذا وانا ما شفتها حظيت بكل الاهتمام
عاشق لها وْفكري بها مشغول حتى فالصلاه
احبها محبةٍ يعجز يوصّفها الكلام
محبةٍ تحيط بالوجدان من كل اتجاه
ساعة سمعت اوصافها سهرت والعالم نيام
اتخيّل انا زينها والقلب غارق في هواه
ومع كمال اوصافها بالزين منتوقة قوام
ما الله خلق في حسنها شيٍ في الدنيا تراه
لباسها السندس و لامن شرّفت به ياسلام
تشخص لها الابصار من زود الاناقه والطراه
مصيونةٍ عن نظرة الاعيان في ظل الخيام
مقصورة للغالي اللي ما حدٍ يازن غلاه
وحتى ابتسامتها تشع انوار وتزيح الظلام
برقٍ سطع ضوه بكل الكون من عالي سماه
وعيون حورٍ تقتل العاشق بنظرات الغرام
والخد نوره تكسف الشمس البهيه من بهاه
وانا لو اعلن حبها ما اظن يلحقني ملام
عاشق و عشقي وصل في حب الحبيبه منتهاه
حبيتها حبٍ شريف وْ لا تحيط بْه الاثام
حبٍ ما به حبٍ يشابه له و لا حبٍ كماه[/b]