[امير القلم]

أهم شي نشني على العجوز الي حاطه عينك على ولدها ثم نفذي مايلي:

1_خليك مع امك ولاتروحين مع البنات وتتهيبلين اصبري عنهم كم شهر لين تتم العملية.

2_امشي وانتي حاطه راسك بين كتوفك ولا ترفعينه ابد حتى لو عورك خلي الفكس دايما في متناول يديك .

3_كلمه خاله خليها دايما على لسانك خاصة لام المعرس عشان تحس بنوع
من التميز عن باقي العجايز .

#ملاحظه.لامانع تنادين عجوز ثانية بخالة عشان اذا مانجحت الخطه مع
العجوز نمبر ون تنجح مع نمبر تو الاحتياط واجب .

4_اذا بدت امك تتكلم انغزيها بكوعك عشان تدخلك فالسالفة حتى لو مالك داعي ...

5_اخوانك الصغار لاحقيهم وطامري معهم وين مايروحون حتى لو ماهي
عادتك بس تصرفي معهم كأنك امهم عشان العجوز تاخذ فكره انك حريصة على ذريتك .

6_كل ما اكلت امك من اكله زينه خليها تقول:نفس الأكله الي تسويها بنتي
حتى لو الأكل من مطعم صيني او مكسيكي .

7_اذا جيتي بتمدين ايدك توجعي وخلي امك تقول:قايلتلك وانا امك ماله داعي
تنظفين جدران البيت الخارجية <<<<اقول نظفي غرفتك اول اللي تقولين
ثايره فيها قنبلة ذرية.

8_اذا تكلموا الحريم عن العرس اكتمي نفسك لين تحمر خدودك عشان يقولون
البنت تستحي ومالنا حق تكلمنا عندها <<<<بس لاتكتمي نفسك مره
اخاف تروحي فيها واصير قتلت نفس بغير حق هع .

9_مهما كان موضوع الحوار حماسي لاتبدين رايك خليك مثل البكما لان اللقافه تجيب اجل الخطة .

10_شعرك افردية لاتخلينه طاير ولاتجعدينه مهما كانت الموضه لان العجايز مايدورون الا الي شعورهم ناعمة .

11_اذا ادلت العجوز<<<ام المعرس المتوهق
بأي رأي سواء سياسي والا وطني والا اقتصادي وافقي عليه حتى لو انه ماسخ
وماله داعي.

#مثال:تقول العجوز:بوش متقهوي عندنا البارح
قوليلها:وليه ماعلمتينا ياخاله نجي نساعدكم؟!

12_في العروس اضغطي على نفسك واقضبي ارضك ولاترقصين واعتبري الرقص عيب وشق جيب.

13_اذا جاء طاري السوق وهولازم يجي الطاري لانه ملح الجلسه عند الحريم
خلي امك تقول:بناتي مايحبون يطلعون السوق ابوهم يجيب اغراضهم .

=الحين العجوز بتكون وقعت في الفخ .

نروح للمعرس الحين.

1_اهجدي في بيت اهلك ولاعاد تطلعين واذا جاالمعرس بيشوفك خلي ابوك
يقول :والله ودي تشوف البنت بدون ماتدري عشان تاخذ راحتك وانا عمك
وبعد تشوفها عالطبيعه ماتقول غشيتوني<<<ايه هين يالشايب والله
لو بيدك ان تحط مكانها باسكال مشعلاني

2_ قبل يجي اليوم الي بيشوفك فيه بحوالي اسبوع او اكثر<<<حسب شين الوجه
طامري من صالون لصالون صبغ فرد تنظيف بشره..إلخ.

3_اذا جا المعرس خلي اخوك يوقف جنبه عشان مايطيل التبحلق ويبان المستخبي
وذلك تطبيق لنظرية<<<اللمحة ذبحه .

4_في نهاية المشهد خلي ابوك يقول:معليش وانا عمك ترى البنت
شوي محيوسه<<<معليه يالشايب تنصب عالمسكين.
وبهاللحظه الولد بينط على راسه ويبوسه لين يشفط مخه ويقول متى العرس ياعم؟

{تحذير مهم جدا }
ابتعدي عن الامهات المتعلمات صاحبات الشنطه نفس لون الجزمه
هذولا يبيلهم خطط بعيدة المدى.