ياغامد اسمع نصيحة بوك وافهمها
نصيحة خاصة لابني غامد وعامة لك من يرى فيها فائدة له
الله يصلح لنا ولكم النية والذرية
ياغامد اسمع نصيحة بوك وافهمها = لا تصد عنها ولا تغيب عن بالك ابوك فسّر معانيها وترجمها = من واقع التجربه تبدع وتهدالك جواهرٍ صغتها لك من مناجمها = ان طعتني ما اهتنى بالعذل عذّالك تمسّك بْطاعة الخلاق والزمّها = تفوز برضى إلاهك والسعد فالك وسنة رسول الهدى فالقلب عظّمها = تحظى بْشفاعته لا من وزنة اعمالك ولوالدينك عليك حْقوق واتممها = بالرفق واللين باقوالك وبافعالك وايام عمرك بما ينفع تغانمها = بالعزم والجهد تتحقق لك امالك وحافظ على حاجتك واحذر تحطّمها = تسترك عن منّةٍ من عمك وخالك واحفظ كرامتك بين الناس واحشمها = ميّز معاني علومك واحكم اقوالك ترى الرياجيل تنقد وانت فاهمها =تتصيّد اخطاك في مقفاك واقبالك ومواطن الريب الاجنّبت مجرمها = ما احدٍ عن افعاله بْيطلبك ويسالك واسراك اللي بوسط الصدر كاتمها = من دونها اختم على الابواب باقفالك لا كشفت اسرارك وبانت معالمها = ذاعوا بها الربع في حلّك وترحالك ولا تمني النفس بالسيئة وتوهمها = ومحاسبينك على يمناك وشمالك احذر غضب خالقك والنفس قاومها = من طاع نفسه على ما تمتني هالك تورّده للمهالك كان ما احرمها = وكشف بنور المعرفه ليلها الحالك ورفاقتك لو بدت بالحرب سالمها = ما تشلّ جور الحمول الا على جمالك تقبل اشوارها لو ما تلايمها = وارخص لها فالمواقف حالك ومالك لابتْك مهما جرى لك دمك من دمها = مالك غنى عن وفاها لو يورالك وان صار به مشكلة قبل تخاصمها = على يدين العوارف حطّ معدالك وخذ الحقوق المصيبه مع خواتمها = واعط الحقوق التي تنحاز في جالك واهل النمايم لا تتسمع نمايمها = عن ناقلين الحكايا جنّب احلالك واحذر ضعاف الروابع لا تزعمها = توقعك في موقع الشرهه وتغتالك لو نكّست عقلها على عمايمها = لا طحت ما حست بْهمك وغربالك والمكرمه لا بديت بْها فتممها = لا ينقص الطيب في وزنك ومكيالك وارزاق ربك على عباده مقسمها = وما كل شيٍ تمنيته تهيالك واعظم دروس الحياه اللي تعلمها = انك اذا اهملت تدفع قيمة اهمالك تلقى نتايج حياتك في قسايمها = مدونه في سجلاتك وتعنى لك ونهاية الحكمه اللي لك مقدمها = من واقع التجربه يالظفر تهدالك اترك بيوت القصايد لا تنظمها = ان كان لا قلتها ما احدٍ توحى لك اخير لك قبل تبدعها وتحكمها = حمّدك إلاهك وشكرك له وهلالك |
شكرا لك يا مسفرجمعان الصفا...
يعطيك العافيه دمت بود |
صح لسانك مسفر الصفا
كلمات من ذهب ونصائح تستحق التامل طابت اوقاتكك |
صح لسانك ابو هلال
مليارات ولا يسدن رائعه من روائعه نص مليء بالحكم والنصائح فضلا على جماليات الشعر راقني لاهنت دام لنا حضورك الجميل تقييمي والفايف ستارز ومودتي ، الشفق |
صح لسانك وسلم منطوقك .. قصيدهـ جزله من شاعر جزل ..
لاهنت .. تقبل مروري .. |
شعر الموعظه هو الشعر الذي يُخلدّ ..
صحّ لسآنك وآعتلى شآنك ولآهنت وسلم منطوقك ,, تقديري وإمتنآني مع خآلص إعجآبي .. يتبعهمآ خمس نجوم وتوشم بـ التميّز ~ |
الساعة الآن 09:54 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir