شبكة شفق - وش هو تعريف المحال

جاني واحد قال : بسأل كم سؤال

وقبل يسأل قلت : أنا ماني خبير !

قال: جاوب بس , يا ولد الحلال

وكل كلمه حِطَّهَا .. بشطرٍ صغير

قال نبدي : وش هو تعريف المُحال ..؟

قلت :

خَل هالكلمه فـ البيت الأخيـر ..!

القهــر : إن شفت دمعـات الرجال

و الوطن : ( إنسان ) .. مِتغيِّر كثير

و الطفل : لعبه على شاطـي الرمال

و الأمل : إحساس في عين الضرير

الوفا : [ قلبين ] .. يجمَعهُم حلال

و الرَجُل : اللـي علـى أهلـه يغير

و الرجا : لا قلت : للواطـي تعال

و الفشل : مدري .. ولكنـه مرير

و الشعر : في وقتنا .. بدر و طلال

زين أوَّل : حيـل يعجبنـي جرير ..!

و الغلا : إحساس إلى حَـد الخيال

و العِشِق : لا شفت مَعشُوقِك تطير

و الجفا : إعكس مفاهيم / الوصال

و الوَصِل : يعنـي تأكَّـد فيك خير

و العقل : تِسْفَـه أقاويـل الجهال

و الجهل : إن قلت عن نفسك كبير

و الخطر : لا صار ما عندك مجال

و البلا : إن صرت معدوم الضمير

و العجب : لا صرت تسأل منهو قال

و التعب : إن كنت تِبْحَثْ عن مصير

والغنى : بالنفس ما هو راس مال

و الفقر : من كان .. بـ أعماله فقير

يكفي يكفي .. أسئله إنهي الجدال

ويـ الله علمني عَن .. السِّر الخطير

ما أبي تضرب لي في غيرك مثال

قول : عنِّك وإعتبر سِرِّك في بير

جات طعنـه مِن جنوبك والشمال

يعني وضعِك بين مِن حُولك خطير

صاحبـي وإن ضاقت بعينك ليال

لك فرشت القلب مفروش الحرير

في [ بلاد الحلم ] .. ممنوع العقال

والمصيبه الشعب ما إختار الأمير

وما ألومك .. كان شدِّيت الرحال

دام بيتك جرح / وفراشك حصير

هذا تعريفي إلى كلمة : مُحَال

شيء ودِّك فيه ولا يمكن يصير ..!

منقول