قصيده سلة أوجاعي اضعها بين ايديكم واملي ان ترتقي لاذواقكم
على طاري الكلام اللي كسر غصن الغلا تكسيّر
وصورني لها خاين وهو من صحته عاري
ماهو ذنبي إذا كان العواذل دبرو تدبير
وخلوا عقدة النّجار تتصدى لمنشاري
بنوا عشقي لها سفاح في جنح الظلام يسير
وهو في واقعه يقطع مسافات الغلا ساري
انا ما جيت ابرر لك سوالف بترك التفسير
ولا جيت ارغم احساسك ولا جيتك بإصراري
انا شخص(ن) عشقتك صح وأنزلتك مكان كبير
ويبقى منزلك عالي ولو ما جبتلك طاري
انا ظامي عشق مره ولكن وين / جم البير
ولا باقي سوى ذكرى جميله داخل اسواري
انا سجن لمشاعر مهمله ما تبغي التهجير
وهذا اللي حصل كامل مع القصه وإقراري
انا شخص(ن) من الماضي وما فكرت بالتطوير
وها المركب رست من كم سنه وتكسّر الصاري
انا قصه جميله /اختفت لكن بلا تبرير
وخبّاها الزمن عنوه هنا في سلة اسراري
انا الماضي/انا الذكرى /انا قصه بلا تفسير
انا فعلاً احبك حيل لو ما جبتلك طاري
وسلامتكم
مصلح بن عبدالله السهيمي