ذكرى عاطره
الحزن حاضر والوقائع بالمآسي عامره= الفرح عاندني وطول الوقت بالصف الاخير
في أول المشوار كم كفٍ تصفق حاضره= لكنّها ما طولت .. غابت في الظرف العسير
الحزن ما هز الكيان بس الظروف تواتره= تزيد في دفعه وتشجيعه على حث المسير
كل الاماني تبخرت .. والحلم حزني كاسره=تبددت وش عاد باقي غير تأنيب الضمير
استوطنت مني شعور الغيظ كله لاخره= لين اعمت عيوني ظلام وصيّرت قلبي كسير
ذيك السحابه طوّلت.. بالحيل كانت ماطره=جادت بماي الحزن واروتني بهمّاله كثير
ما خلت ارضه للجدب بالمزن دوم تبادره=لين ارتوى منها وشال الكف وأشر بالنذير
قال اكتفيت وعافها مل الحزن من خاطره=الحزن هايل والفرح جنبه لبس ثوبٍ قصير
يا غربة ايامي فرح لو كان لحظه عابره=خليني افل الجناح .. وبعالم الفرحه اطير
لا تبخلين ولا تزيدين الظروف القاهره=خليني احس الفرح ممكن يصير او ما يصير؟
مليت من كثر الرحيل والقلب حبك آسره=وحدك هناك تعيش مالك في مساحاته خشير
مكان ما اقبّل ألاقي فيك ذكرى عاطره=انا اشهد اني تهت من بعدك ومن غيرك ضرير
الحزن حاضر لكن الفرحه معاك تشاطره=لا تتركيني للزمن وحدي ولـ أحزاني اسير
يا روضة اليشموم يا ريح العبير الساحره=ضميني بحضنك دفا تعبت من برد الهجير
[/poem]
بقلمي / مصلح السهيمي
التعديل الأخير تم بواسطة الشفق ; 09-17-2013 الساعة 12:00 PM
|