تخيلت النهايه وأبتديت بخطوة التأصيل=وعايشت الفصول الاربعه باخر رواياتي
تصورت الحكايه مشهدين ومسرح وتمثيل=وشخصيه بعيد هناك تتقمص معاناتي
سنه مرت وانا غايب ولي قصه مع الترحيل=مابين الامنيات وواقعي يقتل طموحاتي
حكاية امنياتي والحقيقه تفرض التعديل=وتقتل فرحتي وتضيق في وجهي مساحاتي
انا والحزن . والليل الطويل . وشمعة القنديل=نسامر بعضنا والصبح طوّل ما نوى ياتي
اسامر نجم . اشكي هم . واكثّر من الترتيل=ولكن المسافه والزمن تنحر خيالاتي
تعبت ولا لقيت الا جحود وكثرة التاويل=وتبرير الغياب وسالفة بعض انفعالاتي
عيوني تكتحل بالحزن وافراق المكان الميل=وخز عيني الفراق ولا سمع حتى لصرخاتي
كتبت اخر مشاهدها على قطعه من المنديل=ولكني نسيت وذاب منديلي بدمعاتي
تخيلت النهايه واقتنعت بفكرة التعديل=مع ذلك عجزت اوصل لما يرضي قناعاتي
انا والحزن والليل الطويل وشمعة القنديل=نسامر بعضنا والصبح طوّل ما بغى ياتي
[/poem]
وسلامتكم
مصلح السهيمي