أجمل الأعياد
نفس الشعور / انتابني قبل يومين
احس عيدي غير/ مَعْك انت بالذات
كانت بساتين السعادة / بساتين
اشجارها تـورق ســرور وْ ملذّات
سُكّر كلامك/ رائحة عطرك الحين
حدايق النشوة / نسيم المساءات
لون الكرز في ضحكتك/ نكهة التين
ندى ورودك ... واشتياق المسافات
الله عليك ... اخذتني يِمِّتَك لين
قبّلت بعيوني .. جبين السماوات
سافرْت بك فرْحه وقرّيت بك عين
مَلَيْت كلّ الكون فيني / مسرّات
إطلالتك نبض الغلا للشرايين
ترنيمة العشاق في كل الاوقات
بالمختصر شِف غيمتك ممطرة وين!
لجل ان يتبعها خفوقي و يقتات
أنت المطر للقلب / مستوطن سْنين
من لحظة احلام الصبا و البدايات
نفس المشاعر / عاودت قبل يومين
كان اجمل الأعياد / مَعْك انت بالذات