قالت لي امي 
قالت لي امي وانا مُنهك ومُتعب نكـد
والوادي اللي على جغرافيا العين.. سال
،،،
جابر وانا امك / ولا تعطي لقلبك أحد
إلا لمن يستحي منها القمر (فالجَمَال)
،،،
لك قلب لا من طريت الغيم ... يمِّه صعد
ولك عين تشرب من الورد المصفى زلال
،،،
استمطر الغيم و اتبع كل حنّة رعـــد
وانسج من البرق حورية و معطف و شال
،،،
من صغر سنك _ واظنه_ في زمااان المهد
ما يستثيرك رغيف البُرْ ولعب العيال
،،،
كنت تْعَدِي فالمطر وتشيل حب البَرَد
وتقول يُمّه قدرت اجمع سنون الغزال
،،،
تنظر لنوّ السحاب / تصيييح زيدي بعد
كأنك تْقول ما ملت يديني وصـــال
،،،
من يومها وانت قلب اخضر سكن به جسد
أو يمكن انّه جــســـــد عيّــــــا خَضَاره يزال
،،،
واسترسلت بالسوالف لين دمي جمد
حتى لساني تعثّر بالحكي لين قال:
،،،
يمه كفايه ... أنا مازلت عند الوعد
قلبي مـاهو غصن لا مالت به الريح مال
،،،
صحيح متهوّر أحياناً ، بأيّةْ بلـد
أمُـرّها / والتقي للياسمينه ظلال
،،،
لكنّ ! واللي رفع سقْفْ السما بْلا عـمــــد
إني ولد .... راس ماله طِيب وآبن حلال !
،،،
القلب يمه انا ما اعطيته أيّةْ أحـــــد
شوفيه يستنطق الغيمة ، جواب السؤال....