( دواير مغلقة )
بعض الأمور تبعثر الأوراق في كل اتجاه
تظهر وجيه .. وتختفي في زحمةْ العالم وجيه
،،،،،
وان مِدْلِــهِـــمّ الغيم مــرّ وْلا تحدّر من سماه
ضاقت صدور مخيلينه وانكسر خاطر يبيه
،،،،،
لولا الجهات اربع ولولا كل شيّ لمنتهاه
ما كان علقنا سبب لـ اغرب تساؤلنا / وجيه
،،،،،
ليه الدواير مغلقة ؟ ليه الجبل يكثر حصاه؟
ليه النخيل تْموت مرتفْعة ..... كذا من غير ليه!
،،،،،
ما كل ما يعرف يقال / الا لشد الانتباه
اشيـا نفسرها / وبعض اشياء / تحتاج لـنبيه
،،،،،
البارحة والليل حااالك / والقمر غادر ضياه
ضاعت ملامح كون / ونْجوم السما تسال عليه
،،،،،
يا خيرة الله / مالت غْصون السوالف للشفاه
من بعثر الأوراق في صدري / ومن سبّل يديه !
،،،،،
كنت احسب ان القلب ما دوّر طريق الا لقاه
اثْري تلحفت السراب من النهايه بابتديه
،،،،،
صدق الظروف تبعثر الأوراق في كل اتجاه
غابت وجيه .. وننتظر في زحمة العالم وجيه