وحشتوني تواصلا بكم اقبلوها
الشعر ومضه تجسدها المشاعر خيال
منه الحدث يستثيرك والصور تبهرك
ياليل مطولك وهموم المعنا ثقال
وتقول هذا قليلك وايش عاد اكثرك
الى متى وانت تحداني على الانفعال
صبري نفذ وانت ياثقلك ويامصبرك
من هول ماشفت تتفطر كبود الجمال
لو الجمل شاف ماشافت عيوني برك
ليلي على الكوع وهمومي عراض وطوال
الناس نامت وانا والهم في معترك
بالمختصر حالة الي عايش الفقد حال
ماهو ضروري يعيش الواقع المشترك
بعض المفارق شبيه القتل بالاغتيال
يقتلك غاليك والقانون ماينصرك
ياباشة الغيد من قال ان هجري حلال
فكر معي قبل تخسرني وقبل اخسرك
مافي المحبه مساحه تقبل الاعتدال
اما غلا يسعدك والا جفا يقهرك
وين انت يالي تقاسيمك تغيض الغزال
من اخمصينك لراسك ليمنك وايسرك
لبّا العيون الوساع المفعمه بالجمال
ولبّا جبين(ن) لاشاف المنظره يجهرك
اتذّكرك كل ماهبت هبوب الشمال
وان هبّت من الجنوب اشتاق لك واذكرك
ادخل على الله بلاش من القطيعه تعال
وان طوّلت غيبتك في ذمتي م اعذرك