المسرحية
ماني( عصي الدمع) لودمعتي غير
اقطع سمال الثوب وانفض غباره
المسرحيه وابتدت يا جماهير
الحين اقوم افتح عليها الستاره
الشاعر المغرور مايلحقه خير
الكبر قبره والغرور احتضاره
ماعاد يلقى للجماهير تقدير
ولاهو ملاقي غير زود احتقاره
اعنيك ياللي فيك رفعة مناخير
ياللي تشوف الكبر فن وشطاره
كانك تريد الجد ابعطيك تقرير
والعلم تغني عن طواله قصاره
انا هنا ومعايه كل التقارير
اجيبها لك وبصريح العباره
اعلان صادر من جهتنا وتحذير
النار دايم تبتدي من شراره
هنا التحدي ياطويل العمر غير
اما الهزيمه او تفوز بـ جداره
قدامك اللي حومته حومة الطير
يصيد خصمه مثل صيد الحباره
الشاعر اللي صور الشعر تصوير
سهيمي مايقنع بغير الصداره
ارتب القيفان عقد الغنادير
القاف خاتم والمعاني سواره
اسوق لاجد التحدي طوابير
واذوّق الشعار طعم المراره
اجيب للمغرور هم التفاكير
واعلمه وشلون حرق الزقاره
وامّسكه في الشعر طول المشاوير
مره يمين الخط ومره يساره
اعرفه طنخات روس المناعير
وشنهي فعولي كل ماشنيت غاره
اضيعه في عج روس المغابير
حتى ينخ ويعترف بـ الخساره
اللي يوقف للنجوم المشاهير
ديوان كامل مايرد اعتباره
ماحب مدح النفس لاكنني غير
سواق طاره يعني سواق طاره
المسرحيه وانتهت ياجماهير
خلاص قوم اسدل عليها الستاره
حسن ال مشرف