عناقيد الوفا!
بيض الورق لوحة سما وانت برّاق
وهمّال مزنك يمطر إلا فرايـــد
**
هلّت دموعك يا قلم تغرق أوراق
زرعت من دمعك بيوت القصايد
**
للغالي اللي طلَّته شمس الإشراق
إلا! شبيه البدر وشوي!! زايد
**
يكفيني اسمه طال هامات الآفاق
حين ازهمه راحت همومي بدايد
**
جيوش فكري يالغلا يوم تنساق
حوض المنايا تارده دون قايد
**
تستاهل إن طاحت على شأنك أعناق
تتسابق الهامات دونك وكايــــد
**
قطفت من زهرة شبابي والأعماق
أغلى عناقيد الوفى لك قلايــــد
**
ولفيّت من شأنك مشاهير الأسواق
وشريت لك من غاليات المزايــد
**
وجمعت لك فيض المشاعر والأشواق
هديّتك للعيد يا أغلى معــــايد
**
عيني فراشك والهدب حولك أرواق
وقطّعت لك من لحم جسمي وسايد
**
عشتك وفيني حلم للوصل تـــوّاق
طويت من شأنك طوال البوايـــد
**
خليت قيض الشمس للنفس ترواق
وسود الليالي لا تعبنا سهايـــد
**
لأجلك تحمّلنا رديّين الأبواق
اللي كثـيرين السّفه والنّقايد
**
حمّلت حُبّك للجبل طاح ما طــاق
أضحت صخوره في عداد الهدايد
**
وأنا حملته في شعيرات الأمواق
واسقيتها من دم خفوقي مدايد
**
ابقى وفي لو لفّوا السّاق بالساق
أنا لها في لين وإلا شـــدايد
**
يا هل ترى ؟ للحين خاطرك ماراق ؟؟؟
وإلا المعاند !! والزعل لك عوايـد!!
الهزاااع