من يشبهك
يمر نصف الليل ما رفّ جفني
وأقوم تالي الليل اشكي لرفه
وأنت الذي بالعمد تسعى لحتفي
يا زين طاح القلب ونسيت نزفه
اضحك وأداري الناس والجرح مخفي
أدميت قلبٍ صابته منك رجفة
حسنك يفوق الوصف واحتار وصفي
زهر الخزامى منك ريحه ونحفه
من يشبهك بالزين والزين يظفي
على حلاك ألوان طيفه وترفه
يفداك عمري وأنت أسباب ضعفي
وانته بقلب ِ تسكنه ما تعرفه
ربي يساعدني عسى العين تغفي
لو بس لحظة يغمض الجفن صدفة
خذني لأرضك قبل ما العمر يقفي
أرفق بقلب ِ اتعب الطب وصفه
ماهمني لو كان جرحي ونزفي
يرضيك ! اصبر وانتظر منك رشفه