السلام عليكم ورحمة الله ,,احبتي,,
هي كما هي (في التو واللحظه)
من الراس الي المتصفح
فاقبلوني كما انا
تل قلبي يابن شلوان منسوع الجديل=كل ماقلت السعه قال لي وين السعه
صب في شريان قلبي غرامه سلسبيل=اتنفس واتلذذ غرامه وأجرعه
قبل أشوفه كن مالي في الدنيا خليل =واحتواني من جميع الجهات الأربعه
أخذني عن جملة الناس في يوم وليل=كن مآلي غيره آستقبله واودعه
في حضوره يعتبر كل شي عندي جميل=الشموع مولعه والهجوس مولعه
عِدني اول من تظلل في أظلال النخيل =لاجل عذرا بين عوج الضلوع مربعه
إن تبسم يصبح الكون شكله مستطيل=وإن غمز بالعين زاد الطبيعه توسعه
وان مشى كل الزوايا معه تصهل صهيل=وإن جلس ضمد جروح الزمان الموجعه
وان طلب مني طلب قلت مايخدم بخيل=أنت قربك جود والبعد ربي يقلعه
الحنايا والمعاليق لك جيشٍ وخيل=تتجه حسب اتجاهك وظلك تتبعه
ياعديل الروح شاعرك يهوى المستحيل=ماتواضع لجل غيرك ولا ارخى مسمعه
المحبه والغلا تجعل العاشق ذليل=آآآه من عينٍ تزيد المواجع توسعه
راهنٍ عمري على كف ابو طرفٍ كحيل=كل ماقلت السعه قال لي وين السعه