وهذي هي مجاراتي لقصيدة الشاعر / عمير بن حزام الغامدي
يالله يامنـشـي الــودان وخيـالـه=وبامره تسبّح رعـوده فـي غياشينـه
وقامت بروقـه تلاعـج فـي تنزالـه=واسقى بـه اديـار قـومٍ مستغيثينـه
ياخذ له اسبوع ما اجهى ماطر اثعالـه=وزاعوا له البـدوا بالادبـاش ناحينـه
تشوف نبت الشقارى يكسـي ارمالـه=وتبهر نبوته عيـون اللـي مراعينـه
تغفر لعبدك الى مـن وزنـة اعمالـه=بيـومٍ تشيّـب بهاذيـلـه وراعيـنـه
في ساعةٍ تذهل الشايب عـن اطفالـه=وينسى بهـا الطفـل شيبـانٍ مربينـه
وخلاف ذا راكـب اللـي كـن تبتالـه=صقرٍ علـى صيدتـه فكّـوا قناعينـه
توّه جديدٍ يشـوّق عيـن مـن خالـه=في معرضه مـا بعـد كمـل تمارينـه
على احدث الانظمه سرعتـه باميالـه=وموزنـيـنٍ بساتـمـه وبليتـيـنـه
من شركة الجمس جاين فـوق نقالـه=فريد عصره وفـارع عـن صوالينـه
ما يفيده الا الذي يرخص لـه رْيالـه=موديله اثنا عشر مـن بعـد لا لفينـه
ولا طلّعه سايقه مـن داخـل الصالـه=وتفقـد اوضاعـه وزيتـه وبنزيـنـه
ومن بعد ما اسند علـى ربـه توكالـه=نحر طريـق مـع الهجعـه مسرينـه
لا شل عزمـه تقـول الارض تطوالـه=وبعد السفر ما كـرب همّـة مريدينـه
من سرعته فالطريـق يميـل تمثالـه=وكن المشاهيب تطلق مـن شكامينـه
يرهب على دربه اللي ياقـف اقبالـه=ويتعّب اللـي علـى الخـط مْتقفينـه
لا قـرّ خطـه تقـول الريـح تشتالـه=ومع الملفات يرسي فـوق شاصينـه
ولا بان وجه الصباح وقـرب معدالـه=وسمعـت الاذان تجهـر بـه مواذينـه
نصه لمن يكسب الترحيب مـن جالـه=كساب الامداح في عسره وفـي لينـه
بو خالد اللـي تجمّـل قومـه افعالـه=تشوف معنى الشهامه فـي حجاجينـه
تطْـرب تراحيبـه ويعجـب تولوالـه=في خدمة ضيوفه الى جـوه عانينـه
في مجلسٍ فيه لاهل المعرفـه ظالـه=ضيـوفٍ مكرّمـه وضيـوف لافيـنـه
راع الكـرم بالكرامـه يكـرم سْبـالـه=في نيـل الامجـاد طاليلـةٍ ذراعينـه
اقلط وسلمـه خـطٍ جـوف مرسالـه=معطر بريح الخزامـى مـعْ رياحينـه
مبـداه باسـم الله وسـلام يثنـى لـه=ورد الثناء والجمايـل مـن فتامينـه
على قصيـدٍ سمعتـه تطـرب انفالـه=ويروي قراح القصيد قْلوب ضامينـه
قصيدة مـن جـزال الشعـر وجلالـه=عادة لشعـر النبـط هيبتـة محبينـه
بالمطروي ناشني في روعـة امثالـه=وملـزوم اجاريـه والاحـي ملاحينـه
وأصل الخبر مرسله معْ خيرة عْيالـه=لاعظم فحول الشعر واعظم محامينـه
موجهـه للـذي مـا مـال مكيـالـه=الشاعـر اللـي تجملـنـا براهيـنـه
شاعر علـى قمّـة الامجـاد مدهاله=شعر النظـم ابـرز فْحولـه وراوينـه
والشعر سيفٍ على ضْعاف البُصر ساله=مـن دون هيبتـه يردعهـم بحديـنـه
خليوي اللي عسى وجه السعـد فالـه=شاعر قبيلـه يـدل الـدرب مخطينـه
مشهور بالطيب فـي حلـه وترحالـه=وياسعْـد قـومٍ نهـار الضـد نابينـه
الله يـطـوّل مهـلـه ويكثْرامثـالـه=هو مزبـن الشعـر لا حـدّوه حادينـه
من لابـةٍ فـي نهـار الحـرب قتّالـه=عدوهم من ورى الحـدان ثانينـه
رْفاعه اللي لاجـاء للجيـش زرفالـه=كم شيـخ قـومٍ علـى ربعـه مبكينـه
يشهد لهم في نهـار الـزرب شعلالـه=موقـف جميلـه ولا حنـا بكانيـنـه
خصيمهـم مـا يحصـل كـود جندالـه=في ساحة المعركـه تكسـر ضلاعينـه
اهل حميّـا واهـل تاريـخ واصالـه=والحق ما احنا عن اهل الحق غاطينه
وقت الكرم مثـل مـزن هـل همّالـه=المـال للظيـف والمحتـاج مفنيـنـه
واعـود بالقـاف اللـي واق بقْلالـه=ورقى بمبـداه واعجـز معـه راقينـه
سمحان لامن ركى لحمل الشقا شالـه=اعضـوده مْفتلـه وجنوبـه مْتيـنـه
بو خالد اللـي بـدع شعـره وغنالـه=طاروق يطْـرب بحـر قافـه مغنينـه
يندب خليـوي بشـعره ويتشكوالـه=من عالمٍ باسم شعـر النظـم موذينـه
من بعض شعاره اللي بتـت اوصالـه=وقامـت تحـدى مراشيـده بزاريـنـه
تمزج في القافيـه ميمـه مـع دالـه=وجيمه تقدمه فالمعنـى علـى سينـه
علـى جـزال القصيـد تقـدم هزالـه=وتخلط على ساحته حبه مـع طحينـه
كلٍ علـى حسـب معرفتـه ومنوالـه=ومعجبه تصريـف قيفانـه وتلحينـه
وغيـره بعـد فيـه نهابـه ونشالـه=تسلب مغاريـر تمـره مـن عراجينـه
وكم تاجرٍ صار يتجـر فيـه باموالـه=يسعى ورى الشهره وْيدفـع ملايينـه
قصايـدٍ جاهـزه تشـرى وتهـدالـه=وعبـر القنـوات يتحـدى مباريـنـه
لامن تسمّعت فـي صوتـه وجلجالـه=تدرك ما هو من هل الشعر وعريبينـه
حتى ولو له بجمهـور الشعْـر هالـه=جميعهـم مـن حواشيـه ومواليـنـه
يجاملونـه علـى خفـتـه وهبـالـه=وعن جزل الافكار والاشعـار معمينـه
هـذا يصفـق وهـذا يرمـي عْقالـه=ولا عاد تعرف صحاحه مـن مجانينـه
والشعر حالـه جبيـن الحُـر يندالـه=اللـي غرامـه يشلّـه فـي شرايينـه
ومن لا شرب من زلاله يشرب حْثالـه=ولا طاب حظه ولـو يمـلا جوالينـه
وبعض السلع تنوجد في اطرف بْقالـه=والا الذهـب ميزتـه نـدرة دكاكيـنـه
لكـن ابشـرك بـان الشعـر شـلالـه=ينبـع مـن افكـار عـرافٍ مصفينـه
في ساحـة العـرف فتالـه وحلالـه=وعن مـا يعيّـب مضامينـه منقينـه
ولوكان ما عندهـم تصريـح ووكالـه=لكن من بـار بـه مـا هـم بحانينـه
و لا يفيد من حاد عن منهجه مجفالـه= لابد تفرض عليـه اصعـب قوانينـه
بنقـدٍ يبرهـن مقاساتـه وتفصـالـه=حتـى تعقّـل زحولـه روس غاوينـه
واختـام الاعـلام تكبـيـره وهلاّلـه=وتسبيحةٍ خير من شعـري و تدوينـه
وصلاة ربي عـدد مـا تطبـع الالـه=على خليـل الولـي وافضـل نبيينـه