يومياتنا بشهر رمضان
موضوع حلو ومميز ويستحق التقيم
واكيد في فرق كبير وواضح بين رمضان يوم ماكنا صغار ورمضان الحين
بالنسبه لي ايام رمضان الحين شرات رمضان بالعام
موزعه وقتي بين العباده وبين البرامج
بالنسبه للبرامج
طبعن انا امسك مسلسل واحد وشرط يكون عقب صلاه التراويح واترك الباقي لين عقب رمضان لانه بينعاد وبجوفه فموب مستعيله على جوفته
بس هالرمضان ناويه امسك مسلسل الفاروق بالرغم اني من المعارضين لانهم مثلوا شخصيات طاهر ه واكبر من انه يتم تمثيل دورهم بس الاعلانات اللي جفتها شوقتني وايد صارفين عليه مبلغ ضخم انتاج محطم لباقي المسلسلات جفت الفاصل وتشوقت اجوف المسلسل واطلع على الادوار اذا كان في شي يضر بالشخصيه او لاه
هذا بالنسبه لمسلسلات بس طبعن باقي الوقت
بالنسبه للفطور
طبعن البجكارات يسون فطور اللي ااباه واللي اقولهن عليه واذا خواتي بيفطرن في بيتنا مع رياييلهن
طبعن يخبرن البجكارات شو يبن عشان يزهبون الفطور وجي وحتى بالنسبه للذياب نفس الحاله بس خليفه يخبرني عشان اخبرهن وابويه ماعنده شي محدد اي شي يمشي على قولته المهم نطرشله مرات للمزرعه اذا مافطر في البيت يعني لازم يجهز قبل ساعتين عشان يمديه الدريول يوصله الفطور بسسس
الشي الوحيد ملزم عليه ابويه هو انه الفطور ضروري يوصل للمسيد اول بأول
عشان الاجر
وطبعن اختكم وحبيبتكم روضه ماتبا الاجر يضيع عليها فتقوم
تقوم تنجب ( تغرف) الفطور بنفسها يعني ومستحيل اترك الخدامات ينجبن ( يغرفن) وتوزيعات اهم شي للمسيد او ل مكان يتم ارسال الفطور فيه
وبيني بينكم مااوزع على الجيران لانه كله يضيعون مواعيننا فخذت درس اني مااوزع عليهم ابصراحه مافيني كل مره اخذلي مواعين بالمبلغ الفلاني ويضيع عليا وماتعودت اوزع فطور بمواعين اي كلام وبعدين فريجنا وايد كبير ومحد فاضي للثاني يطرش فطور
بس المسيد مايباله غير صينيه عوده ( كبيره) واغرف فيهاا لاعيش واللحم او سمج المهم اليدام او الثريد وصحن هريس ضروري يكون مع العيش يعني كل يومين وثلاث كذا مجبه هريس ( المجبه يعني هالطاسه اللي تحفظ حراره الاكل )
طبعن غير دله قهوة وجاي هالاشياء ضروريه والتمر ولنا اجر اكثر اذا كان للمسجد وجي اجر اكبر بوايد لانه المسجد يجمعون فيه العمال الفقارى راعي الدكاكين والناس اللي ماتسوي فطور في بيتها فاجرهم اكبر ان شالله
المهم طول شهر رمضان الأصناف اللي تدخل ظمن الفطور مرات جي وجي يعني موب كلهن في يوم واحد
الصحون الدسمه( العيوش من برياني ومجبوس ومشاوي معكرونه وعيش ابيض بالرمان ولازانيا والثريد والهريس )
الشوربات( شوربه جزر وشوربه كرفس وشوربه لحم وشوربه ذره )
السويت( بسكوت القشطه كيكات بمختلف نكهاتها كب كيك وجي بسبوسه سلطه فواكه وكاستريد بالقشطه او العادي وبس تقريبن )
للمشروبات ( عصاير جاهزة فريش نعصرها في البيت او المراعي الصغار بمختلف نكهاتها ولبن بالنعناع او العادي مال العين او مراعي )
المعجنات( سينبون جيكن توست بالاضافه لبيتزا ومرات معجنات بمختلف حشواتها من لبنه وخيار وزعتر وفلافل وجي )
طبعن مرات نطلب معجنات جاهزة مانسويها في البيت والكيك جاهز ناخذه من محل جوكليت مانسويه في البيت
المهم
ها بالنسبه للفطور طبعن
بس بالنسبه للعباده ..
اصلي التراويح في البيت واختم القران الحمدلله مرتين في الشهر طبعن بالاضافه مااقدر في العشر الاواخر اصلي قيام الليل في المسيد لانه محد يروح معاي وموب عدله اروح بروحي
وخليفه مستحيل يصلي عنده عقده في هالناحيه الله يهديه يعني كله يتذمر وبتافف وجي مااقدر اقنعه يروح معاي
فمجبورة اصلي في البيت وذياب عالم ثاني بعيد عن عالمنا وبرنامج خاص فيه
وابويه ربي يحفظه مواضب على الفروض الخمس والسنن بس ماهذري يروح القيام
والاجر على النيه ان شالله مايضيع اجري عند الله لانه النيه مبيته في القلب
بس ابصراحه انا احط على قناه مكه او سعوديه واجوف النقل المباشر لصلاه التراويح والقيام في العشر الاواخر بصوت السديس عاد السديس يخليك تروح عالم ثاني بصوته في القراءه ابصراحه غصبن عنك يخشع قلبك
وهالشي مستحيل افوته مستحيل اضيع اي يوم ومااجوف فيه صلاه التراويح طبعن مااقدر احظر الصلاه لاختلاف الوقت بينا وبينكم واللي هي ساعه
وجي بالنسبه للعباده
صح نسيت ارمس عن زياراتي الا وهي كالاتالي اقوم بزياره لبيت اختي الكبيره مره وحده في رمضان لانه في العين
واسير ازور وحده من ربيعات امي الله يرحمها ايام الزمان المسكينه للحين تزورنا والظليمه شينه مااقطعتنا وخواتيه الباقيات اجوفهن في بيتنا يعني مايحتاي ازورهن وبسس كل وقتي في البيت حتى المول مااسيرله في رمضان الا اذا اخر رمضان عشان اخلص امور العيد وجي
وامبارك عليكم شهر رمضان وعساكم من العادين فيه والسالمين كل سنه وكل حول..