[مسفرجمعان الصفا]

اه ياصعب المفارق ويا صعب الوداع= لحظةٍ من هولها ينذهل عقل الشجيع
لحظةٍ تختفّ موجاتها قلب الشجاع= ولو هوْ اقسى من صليب الحجر لازم يميع
بين ميلاد المفارق وموت الاجتماع =ساعةٍ يتبدد الحلم والفرحه تضيع
عشتها حزن وغرابه ولوعه والتياع = ومن عناها ضاق صدري ولو بالي وسيع
اجذب الونات واعوي كما عوي السباع=في دياجر ليلةٍ جوها برد وصقيع
واتوجد وجد من راح في طرقة ضياع = اختفا علمه وثاروا دواويره فزيع
ابحثوا عنه وْلفوا راجيعين بلا اقتناع = انقطع منه الرجا وانكفوا دونه رجيع
وياوجودي بعد طول النيا والانقطاع = وجد ابن هدلان من فرقة اخوه الفديع
عضده وسيفه ليا اشتدت اوتار النزاع = الشجاع اللي على لابته حصنٍ منيع
مات من ذكره على باقي اقرانه يشاع = وبقي شاح بعد فرقاه في حزن شنيع
ونا عشت من الاسى فوق قدر المستطاع = وكن فوق الكبد جمر يلذعها لذيع
صابني ما صاب شالح من احزان وصراع = معْ همومٍ هبت بخافقي من كل ريع
كلها باسباب من توها لبست قناع = توها في مقتبل عمرها باول ربيع
في طرات العمر بين الثيه والرباع = عن وفا العشرين يبقى اربع اسنين تبيع
متعة الدنيا اذا كان فالدنيا متاع = بالحلا والحسن والذوق والفن البديع
غظةٍ زادة حلاها تغنج وانخضاع =روعةٍ من حسنها تشفي القلب الوجيع
والثنايا بين حمر الشفاه إلها التماع =والكلام اللي كما الشهد والذوق الرفيع
ولاذكرت الخد والقد والحور الوساع = انجرح وانهار وتهل عبراتي سريع
قطعةٍ من شمس مادري قمر مادري شعاع =لويراها قاضي المحكمه عقله يضيع
عشت معها اجمل عصور الهوى والاندفاع =وقبل اودعها وانا اقول قلبي لك وديع
لجل يدعيها لذكراي مع الايام داع = ولا يغر بها الزمن لو ترى لوجهه لميع
ودارة الدنيا علينا وضاع الحلم ضاع =واختلف منهاجنا بعد ما كنا جميع
فان شرحت الوضع ضحكوا بي الناس الرعاع = وان كتمته والله اني لكتمه مااستطيع
لكن الله يجمع الشمل من بعد الضياع =وفي نهار العرض تكتب لنا الجنه جميع