على طاري الدموع
ـــــــــــــــــــــــــــــــ
على طاري الدموع اللي نثرتيها هنا وهناك
دخيلك مابقا داعي لدمعك لاتهلينه
ادري ضامك احساس الندامه والغياب اضناك
ولاكن وش يفيد اللي طعونه سبة يدينه
تباطيت الكلام اللي تعجلته على فرقاك
واستعجلت الكلام اللي تباطيتي تقولينه
حسافه يالغرام اللي تقاسمته انا وياك
خساره يالزمان اللي سرقتي اجمل سنينه
صحا كل الكلام اللي تملل من سكوت شفاك
ملل كل الكلام اللي على غفله تصحينه
نسيت اني ذكرت انسا غراما مانسى ذكراك
وذكرت اني نسيت اذكر غراما مات في حينه
تمرد اصغر اوجاعي على ضلمك الين انهاك
تمرد واعلن الثوره على العشق وسلاطينه
تضنين الوصال اقرب محبه من طرف يمناك
وانا اشوف الوصال ابعد جفا مما تضنينه
انا ذاك القريب اللي تعبت وماوصلت اقصاك
وانا ذاك البعيد اللي قريب وماتشوفينه
انا اللي خاب ضن الحب فيني من وفاي معاك
انا اللي بالوفاءخنته بعد ماطحت من عينه
يقولون الجمل طايح وانا ماطحت فوق اشواك
تلقفني الشموخ اللي فرش لي راحة ايدينه
يقولون الجمل طايح تمنع من طعون اعداك
وانا اقول الجمل واقف ولو تكثر سكاكينه
حسن ال مشرف
8/10/1435