[رمضان المنتشري]

مابين يمكن نكون ويمكن ان لانكون=الرمي كثر المطر والطير عيا يطير
كنه يقول ارجموني قد ما تقدرون= انا ليا ضقت منكم في سماي استدير
ياطير ربي وهب لك مخلبين وعيون=واعطاك جنحان نفاثه ولا انت بضرير
ابيك ترحل و(تحقرهم) ويستاهلون=انته ما بين السما والارض نعم السفير
يا عنك ما بيّن الا بعض ما يضمرون=والخافي اعظم لكن الكذب حبله قصير
شابت رموش السنه من كثر مايكذبون=من شان عين الفرزدق عذربوا في جرير
طول حديث المسا والسالفه ذو شجون=الظاهر ان العواقب ماتبشر بخير
متناقضات الزمن لا توصلك للجنون=إن نامت العين/حذرا لاينام الضمير
كم من وزيراستبد امسى رهين السجون=وكم من سجينٍ طلع واصبح برتبة وزير
تخيل انك تنام محملٍ بالديون=والصبح ولياك رجل اعمال مليار دير
يارب عفوك وانا لله من الراجعون=ألوذ بحماك يانعم السند والنصير
اللي من اول صغير اصبح علينا يمون=واللي من أول كبير اليوم عود صغير