[مسفرجمعان الصفا]

من هيض هاجوس القصيد اللي تهيض بْه الصدور=شف الخيال الشره يرقى معْ بعيدات المنال
لو اسهرت عيني وتعب الفكر ماني بمعذور =عندي مهمه واتحمّل لجلها دْروبٍ طوال
رقيت عسرات الجبال او غصت غبات البحور= صيد الشوارد غايتي لو دونها بحور وْجبال
ابي الى من كبرت الظاله وجاءْ للشعر دور =والسالفه تدرج ومعها الكيف في صفر الدلال
ثم انصتوا لمسيرات المعرفه كل الحضور = ما اقول قول الا يجملني مع وجيه الرجال
لا خذت دوري جبت لي باقه من وْرود وْ زهور = يفوح معها من شذا افكاري عبير وطيب فال
احشم جناب الشعر واقدّر طويلين الشبور = اهل الحكم واهل الشعر واهل المواقيف الجزال
لهم عليّه حق والتقدير والطيب مخبور = عند القروم اللي تروم المجد واكرام السبال
شروى الحضور اللي بكسب المدح ما فيهم قصور = زحول الرجال مبددين الخوف في شهب الليال
فيهم نوادر مهجتي تطنخ ومعناها فخور = روابعٍ تطرب لها افكاري ويبدعها الخيال
الشعر عندي معتبر وابدعه من صدق الشعور = ولا بدعته طالب الشهره ولا شحاذ مال
ماني كما اللي يمتطي صهوته من شان الظهور = في كل وادي به يهيم ولا بنى بنوه هيال
وقام يتبهرج بالقصيد ويلبس ثْياب الغرور = يشوف ما لاسمه نديد ولا معَ امثاله مثال
والشعر ما يرفع مقام الرجل لا صار معثور = ان كان ما به دين معْ طالت ذراع وطول بال
وكرامةٍ ترفع مقام الرجل عن بعض الامور = اللي تشوه سمعته لا هام بدروب الظلال
واختامها نفحه من الكمبود معْ بنّة عطور = يفوح معها من شذا شعري تماثيلٍ جزال