[عبدالله العطافي]

إن نظرنا ( كل كلمة تثير الانتباه )
وان كتبت صدورالاوراق مافيها سعه

والقلم من سوء حظه محل الاشتباه
متهم عند اكثر الناس لو جاب اربعة

حين يكتب جدول الضرب قالوا وشبلاه
وان بدا بالطرح قالوا ورا ما يجمعه

ويوم تمشي بعض الاقلام حسب الأتجاه
يمنع المأجور والحُر محدن يمنعه

ومن يطيع اهل الغوايات وافكار الطُغاه
ودك انك من مكانك تقوم وتصفعه

وانت اللي من ذنوبك تبي طوق النجاة
ما يفيدك غير طاعة وطيبٍ تزرعه

زيّن اخلاقك مع الخلق في هذي الحياة
سيرة ابن أدم تؤطيه والا ترفعه

لا تكبّر وين ما رحت يا مال الغناه
اعرف الانسان من طين واصله مرجعه

ان عرفنا ذلك اليوم من يمشي وراه
الحقيقة في رجوعه ثلاثة تتبعه

نعرف ان ثنين ترجع ومن يبقى معاه
يا يضره في مخاواه والا ينفعه

يوم يطلع زين يفرح وكثّر له نباه
وده انه زاد مرات يوم ان صنعه

ويوم يطلع شين بالحال لو يقدر شناه
وده انه ما يعرفه ولا يجلس معه