[ابو عبدالله القرني]

اذا كان الهوى ياصاحبي مقدور نسيانه
شطب نوم السهير السهد من كراسة جفونه

واذا كان الشعر ياصاحبي مغفور كتمانه
كتمته ،، قبل لايوصل قلوب ٍ تنقفل دونه

وش الحيلة ,, وصوتي مبطي ٍ يكفخ بجنحانه
وما به في سما الكلمات حرف ٍ ينهي حزونه

عرفت ان البحر كم ذاد بامواجه عن الدانه
وعرفت ان الشجر كم شام بظلاله عن غصونه

وحسبت ان الغنا اسمى من اـّا نعرف الحانه
وحسبت ان العنا اصعب من انــّـا نوصف شلونه

لقيت ان الغنا دانه على دانه على دانه
ولقيت ان العنا : " يامل قلب ٍزادت طعونه " !

ضمير الصبح لو والف عصافيره وغربانه
تراها خوة ٍ ياصاحبي ماهيب مامونه

اذا صار الشعر يمشي على عكازة اوزانه
تعمـّـق في قصايدهم : كسيرة / بس : موزونه !

ترى لولا وفا المهر ورضاه بسلطة عنانه
تعثـّـر شاعر ٍ سمر السحايب فيه مفتونه

يكــّون له صلة بين الرياح وهمة حصانه
غدت له من عقب رحلة شتات الأمس مديونه

يغنــّي .. والصحاري جرحها يخمد بقيفانه
يغني .. والمدينة نبضها يصحى على لحونه

حلم لو يصلح العالم .. حلم لو يقلب احيانه
يشيل هموم شمس ٍ في تراب الليل مدفونه

يشوف الفرق مابين الزمن واللازمن : خانه
ومن يحتلها يصعد /// ويهدي النجم مكنونه

وجيتك ... منصدم في وقتي اللي غيــّـر الوانه
وانا ذاك اللّي بخبرك يموت وثابت ٍ لونه

انا من شيد احلامه ،،، وجارى الغيم بنيانه
وانا من قيد الدمعات في زنزانة عيونه

هقيت ان العذر يعني : غلا الوافي بخلانه
لقيت ان العذر يهطل ،، ومحد ٍ يدرك مزونه

هجرتك .. مادريت ان الهجر مجهول عنوانه
وطيفك من ديار البال عيت تقفي ظعونه

انا لو قلت : بحرق طيفك // وبدفى بهجرانه
تقول الذكريات اللي معي : خله على هونه

منعني - لو نسيتك - مجلس ٍ تطريك جدرانه
منعني ناظر ٍ قد له سنين يداعبك نونه

منعني شارع انواره لمشي الأمس ولهانه :
أحدنا يندب جـْـنانه .. واحدنا يكتب جنونه

احدنا ماخذ الدنيا فــْ بساطة فهمه احزانه
واحدنا ماخذ الدنيا بـْـ صعوبة تركه ظنونه

احدنا عدّها : غاية / وعشق انسان وانسانه
واحدنا عدّها : مبدا / وحلم / وفرض كينونه

هناك اللي بقى يضحك ،، وهو راضي بحرمانه
وذاك اللي لقا بين الكتب / والعاصفة : عونه !

اخاف ان البحر ياصاحبي ينسيك شطانه
ترى لولا الشواطي مارقيت الموج ومتونه

على وين المسير ؟ الجفن ضايع ،، والدجى حانه
غوت ضي النجوم اللي بذاك الكاس مغبونه !

انا ماشفت مثله مؤمن بصدقه وبهتانه
وانا ماشفت مثله زاهد ٍ في ماحوى كونه

مثل عبد ٍ رفض احلى البنات تــْـقـبـّـل اوجانه
غريبة .. كيف مايرضى الغزالة تنهي شجونه ؟

اذا خالف طريق اللي تغرّب وجهة اوطانه
فيا شينه مصير ٍ قام يقطع غصن زيتونه

غدر .. كل الكلام اللي غراه الطرس باحضانه
وفي .. كل الكلام اللي لقى الحرية: سجونه !!

حسافة صوتي اللي مامداها تورق اغصانه
تعارض رحلته للعطر نية كف مجنونه

وحسافة غيمي اللي واهبك وبله وهتانه
تصّوب نـُـبله وجوده بنــُـبـْـل ٍ منك مسنونه

وجيتك .. شرهة ٍ ياصاحبي بالهم مليانه
تقول : شلون ماعبـّـر عباير بنت مزيونه ؟

تقول : شلون ليل البارحة يمديك سلوانه؟
تقول : شلون ديوان الامين انساك هارونه ؟

قصيدي لاكتبته قاااااااااامت الدنيا على شانه
غريبة يوم جالك ... تقفل البيبان من دونه !!

[ملكة نفسي]

يعطيك الف عافية ابو عبدالله
كم انت رائع في الاختيار
تكسي الحروف ابهى الحلل
وترسم للاختيار مكان في القمم
لاخلا ولاعدم استاذي

[بقايا حلم]

نقلت لنا من القصائد اروعها

راق لي ما راق لك
دمت بنقااء

[احساس انثى]

صَح لسآن شآعرهآ وسلمت يدك آخي آلكَريم

[ابو دماس]

ابو عبدالله صح كلك ولاهنت
إنتقاء جميل كجمال قلبك