[الشفق]

قصيدة المعلمه سارة ا في احدى مدارس عنيزه يوم شافت حبيبها جاي يسجل بنته :




يانوره بالله اسمعي لاتصدين
يابنت حرن مركزه بالصداره

شي جرالي قسم القلب قسمين
وابلا ملامه افهمي للعبارة

باول دوام المدرسه يوم الأثنين
معلمه في وجه باب الأداره

...وقفت باللجنه على سادس اثنين
مثل المجند ينتظر للأشاره

هاذي تنادي وهاذي ابله انا وين
زحمه وتو اليوم بأول نهاره

اصوت لثنتين وبيدي ثنتين
نوره مضاوي عايشه مي ياره

وسمعت صوتن رجع القلب لسنين
صوت الذي اسمه بنقش السواره

اختي عن اذنش ناقل البنت هالحين
تفضلي الأوراق والأستماره

عجزت لا اجاوب ولا ارمش العين
طول سكوتي وهو طال انتظاره

حسيت ان الدم مثل البراكين
شريان قلبي وصل حد انفجاره

ورفعت راسي وصارت العين بالعين
ولمحت في عينه سواة الشراره

هو هو والا واهمه يامسلمين
زوله ورفعة حاجبه مع سماره

لا ماتغير فيه ياكود شيين
حف الشنب والشيب زاد بوقاره

اتلا علاقتنا ثلاثه وتسعين
باول حلاة العمر قبل انكساره

الشاهد الله ماحصل بيننا شين
ولا يخدش احساس بنت وعذاره

نعم الحبيب اللين الطيب الزين
ونعم الرفيق اللي حفظ حق جاره

ياوجه ابوي الوجه مرحب وسهلين
لا يابعد روح ومعاليق ساره

ودي المه وودي اصيح بس وين
مثل الكسير اللي نشب وسط غاره

مايستطيع المشي من دون رجلين
وحوله جنودن تشتهر بالشطاره

ياللأسف هالحين صرنا غريبين
حكم القدر واصدر علينا قراره

الهم والغربال والفقد والبين
وانا اسيره تنتظر للزياره

ويلي على لاماك ويلاه ياحسين
يامن يجمعنا واسوق البشاره

ساره وسكت له لحظه كنها سنين
واقفا واشوفه يوم شب الزقاره

رد حسين على قصيده معشوقته القديمه ساره

يامرحبا ياغايتي ياهـ♡ـلاوين
يابنت عودن فيه طيب ونعاره

لا يابعد كل البنات المزايين
يافرحت المظلوم يوم انتصاره

من يوم ماغبتي وانا ماني بزين
ضايق واحس القلب طال انتظاره

دايم على بالي وانتي تمرين
واقول يفدوها جميع العذاره

لو الليالي ترجع لعشرة اسنين
ماكان شفتي الشيب زاد بوقاره

لا مانسيتك من ثلاثة وتسعين
وشلون ابنسى حب واضح مساره

تدرين شاللي هزني يوم الأثنين
واللي ذبح قلبي بأول نهاره

زولك لمحته يوم كنتي تمشين
بين الصفوف اقبال باب الأداره

وفز الخفوق وقلت ياربي تعين
هي هي ولاهي شبيهه لساره

جيتك وقلت ابنقل البنت هالحين
تفضلي الأوراق والأستماره

طول سكاتك والبلا العين بالعين
ضقت واحس بضغط مدري حراره

وخانتني الدمعه وطاحت من العين
كني طفل يبكي مضيع دياره

بحط بنتي عندك بسادس اثنين
عشان اكثر جيتي بالزياره

واليا دخلت الصف لازم تخشين
اسمي لانه مسجلن بالسواره

وامانتك انك عليها تخافين
لحدن يضايقها بأيت عباره

بصارحك في شي يمكن تحسين
ان الزمن اقفى علينا قطاره

انا سمعت ان اكبر عيالك حسين
وانتي اكيد انك سمعتي بساره ✒༌༌༄

اما البيت الاخير أليييييم

ااااااا
رد محب سعودي(معلم بسكاكا)

قريت قاف حسين ثم سالت العين
ولا ادري علام الدمع زاد انهماره

ياحسين مالومك تحسر على الزين
عشرة عمر والعشق واضح مساره

بقيت وافي له من سنين وسنين
واكبر دليل مسمي البنت ساره

ولجل الغلا سمت ولدها على حسين
عزالله انك تستحق الصداره

ياحسين تدري ليه ابكي من البين
وقلبي كسير وزاد فيه انكساره

ذكرتني ياحسين ياحسين ياحسين
بالغالي اللي له بقلبي وقاره

علمي بهم ياحسين اربع وتسعين
وهالحين ماادري وين صارت دياره

قفّت من الخفجي ولاادري على وين
وانا نقلت الجوف وعيني لداره

ياحسين حبه ساطين بالشرايين
وعساي اشوفه مثل ماشفت ساره.

بشده لامست احساسي!

[الحنين]

.،

مرتين ادخل واطلع وأنا ابكي لا استطيع التعليق ...
لكن الله يعطيك العافية .
دمت برضى الرب ...

[الرحيل]

تستحق المرور
رائعه بالرغم من ان قصتها متعبه
شكرا الشفق
دمت بود

[جدار الصمت]

قصه وقصايد حزينه بالفعل
ومواقف موجعه
شكرا الشفق
تقبل مروري ومعه شكري
جدار الصمت

[ابو دماس]

ما اجملها برغم الفرااق
ولكنها اتت بين المحبيين
واعادة الذكريات بالرغم من انهم لم ينسون بعض

راقت لي كثيرا اخوي الهزااع
وفقك الله لكل خير وبارك فيك

[شلمار]

قصه جميله فيها الوفاء والاخلاص
رغم منغصات الحياة
الا ان القدر والنصيب يفعل ما يشاء

راقت لي الهزاااااااع

ذوووووق

شلمار

[احمد الكثيري]

برغم انني عشت تلك المعاناه وتعبت منها الا انني قريت هذه القصه وآلمتني
بارك الله فيك وسلمت على النقل

[الشفق]

اقتباس: المشاركة الأصلية كتبت بواسطة الحنين     .، مرتين ادخل واطلع وأنا ابكي لا استطيع التعليق ... لكن الله يعطيك العافية . دمت برضى الرب ...

هلابك الحنين
كذلك الحال بالنسبه لي
ممتن لمرورك المشرق
دمتِ بسعادة الكون
،
الشفق

[الشفق]

اقتباس: المشاركة الأصلية كتبت بواسطة الرحيل     تستحق المرور رائعه بالرغم من ان قصتها متعبه شكرا الشفق دمت بود

الرحيل
ممتن لشرف مرورك
لك شكر لا ينتهي
ودمت بسعاده
،
الشفق

[الشفق]

اقتباس: المشاركة الأصلية كتبت بواسطة جدار الصمت     قصه وقصايد حزينه بالفعل ومواقف موجعه شكرا الشفق تقبل مروري ومعه شكري جدار الصمت

جدار الصمت
ممتن لشرف المرور
ولك تراتيل شكر لا تنتهي
دمت بسعاده ابديه
،
الشفق