انتي اللي تستحقين الغلا والحب كلّه

ياحياتي غير حبك ما بنى فالقلب فلّه = ولا فرشت لْه الضلوع وّرود وزهورٍ رهيبه
افتخر في حبك اللي يذهل العشاق دلّه = سامي وزامي وحوله ما يجي شكٍ وريبه
مسكنك في قلبي اللي ما حدٍ قبلك وصلّه = ومن جنود الشوق لك فعيون محبوبك كتيبه
انتي اللي تستحقين الغلا والحب كلّه = حبك اسمى حب وانتي فالحياه اصدق حبيبه
في رحابك ينتعش سوق الاحبه والاخلّه = ومن زهورك يستلف زهر النفل مسكه وطيبه
كل من يعشق غرامك يالاصيله ما يملّه = ومن كسب رضاك في دنياه ياماسْعد نصيبه
شايله هم الحبيب اللي بقلبك مستحلّه = في عيونك طفل حتى لو كسى عارضه شيبه
لا ابتعد عينك من اجله دمعها الطاهر تهلّه = ولا حضر شلتيه بالاحظان في قصة عجيبه
تسعدك سعادته في كل شرع وكل ملّه = وتفرحين بفرحته لو كنتي بوضعك كئيبه
وكان تعّبه المرض او جاه من وقته تخلّه = ما لقي غيرك الى من زادة اوجاعه طبيبه
طلتك ما مثلها في عين من يهواك طلّه = ومعْ جلالة قدرك اعطاك الولي رحمه وهيبه
الوفاءْ والصدق والاخلاص لك طبع وجبلّه = ومن غرامك يبتدي صدق الغرام وينتهيبه
وانتي اللي تستحقين الغلا والحب كلّه = حبك اشرف حب وانتي فالحياه اشرف حبيبه